Медодзза букварь коми-пермяцкӧй кыв вылын петіс 1894 воӧ Перемын. Сійӧ лӧсьӧтіс велӧтісь Ермолай Евдокимович Попов, кöда чужис Кекур деревняын.
Букварь шусис «Выддемъ пермякъ понда» и сулаліс 15 листбокись. Медодзза коми-пермяцкöй букварь унаöн оз вачкись öння небöг вылö. Сэтӧн абу серпассэз, быд шыпас дынӧ сетӧмӧсь кыввез да сёрникузяэз, пантасьлӧ ӧтік текст.
Сідз кыдз сія петіс 19 векӧ, гижан правилоэз небӧгас мӧдікӧсь.
Видзӧтам, 7 л.б. вылын сетӧм сэтшӧм сёрникузя: Анна менымъ вурисъ шабуръ. Ӧння правилоэз сьӧрті мийӧ гижим этадз: Анна меным вурис шабур.
Содтӧт литература:
- https://viewer.rusneb.ru/ru/000200_000018_RU_NLR_ONL1_65?page=2&rotate=0&theme=white (позьӧ видзӧтны небӧгсӧ быдсӧн)
- https://комиокруг.рф/nasha-gordosty/popov-ermolay-evdokimovitch-1859-1917.html
- http://www.fnperm.ru/попов-ермолай-евдокимович.aspx
