Официально-деловöй стиль – этö литературнöй кывлöн стиль, кӧда пырйöт гижиссез да баитiссез öтамöд коласын аркмöтöны быдкодь правовöй йитсьöммез. Эта стиль паськалӧм политикаын, экономикаын, юриспруденцияын, бизнесын, маркетингын.
Официально-деловöй стильлöн мог – тырмöмви висьтавны информация, тшöктыны керны коланаö, юöртны аскадö медшöрсö.
Ассямаыс официально-деловöй стильлöн:
- Дженыта да точнöя висьталöм (пыртöмась öтiк вежöртаса кыввез);
- Только факттэз гижöм, думалöн сьöрсьöн-бöрсьöн мунöм;
- Öтiк и сiя жö тэчас быд документ понда. Колана торрез: документлöн ним (расписка, заявленнё, доверенность), лунлöн да годлöн число, кырымпас (подпись), сёрнилöн кыввез (кора отсавны, тшöкта, лыддя коланаöн, юралiсь, колö уважайтны, шогми 20… воö да с.о.);
- Абуӧсь и оз вермö лоны эмоционально-оценочнöй кыввез;
- Кыв средствоэз: лексическöйöсь (специальнöй терминология, канцелярскöй кыввез, торья устойчивöй кывтэчассэз, кыввез-тшöктöммез), морфологическöйöсь (инфинитив, кадакыв öння кадын), синтаксическöйöсь (однороднöй членнэз, осложнённöй сёрникузяэз, безличнöй конструкцияэз, кыввезлöн веськыт порядок).
- Торйöтсьöны куим вида документтэз:
а) йитöмöсь законнэзöн (конституция, закон, устав, акт, указ);
б) йитöмöсь деловöй письмоöн, канцелярияöн (договор, справка, автобиография, приказ, анкета, заявленнё, инструкция, отчёт, протокол, резюме, характеристика и с.о.);
в) йитöмöсь дипломат уджöн (нота, конвенция, меморандум, коммюнике и с.о.).
Коми-Пермяцкӧй округын 1930-1940 годдэзö делопроизводство мунiс и коми-пермяцкöй, и роч кыввез вылын. Талун официально-деловöй стиль коми-пермяк кылын пантасьлö шоча.