18-19 векся коми-пермяцкöй кыв вылын кывчукӧррез [1]. Коми-пермяцкöй лексикографияö пондöтчöм пуктiсö учёнöй-путешественникез, кöдна пасйисö кыввез да аркмöтiсö неыджыт кывчукöррез Российскöй империялöн уна быдкодь кыввез сьöртi.
Камскöй кыв сьöртi лексическöй материал 18 векын öктöм сэтшöм источниккезын:
Г.Ф.Миллерлӧн «Собрание русской истории», Т.III, С-Петербург, 1758 вося небӧгын 358-408 листбоккез вылын öтлаын коми-зырянскöй да удмуртскöй кыввезкöт пантасьлӧны ойвывся (севернöй) диалектлöн коми-пермяцкöй кыввез.
«Дневные записки путешествия академика Лепёхина», небӧгын (куимӧт томын), кӧда петіс Санкт-Петербургын 1780 воӧ, сетöмöсь роч кыв вылö вуджöтöмöн 50 коми-пермяцкöй кыв.
Кынымкö сотня коми-пермяцкöй кыв ӧктӧм аслас уджӧ «Сравнительные словари всех языков и наречий, собранные десницею Всевысочайшей особы», кöда петiс С-Петербургын 1787 воö, академик П.С.Паллас.
Коми-пермяцкӧй кыв сьӧрті материал туйӧ адззыны и рукописнöй памятниккезын:
1785 воын Антоний Поповлӧн петіс «Краткий Пермский словарь с российским переводом, собранный и по алфавиту расположенный» кывчукöр, кытӧн чукӧртӧм 2500 гöгöр кыв.
4500 гӧгӧр кылісь 1828 воын петіс «Лексикон пермского языка, кратко выбранный и по алфавиту расположенный села Кудымкарского бывшим священником иереем Георгием Чечулиным». Ассямаыс эта небӧгын сія, мый кыввезын мыччалöмöсь удареннёэз.
1848 воын Усолье карын петіс «Словарь русско-пермяцкий». Кывчукöрö пыртöмöсь косинско-камскöй диалект вылын 4000 гöгöр кыв.
Ыджыт места 19 векын босьтö Н.А.Роговлöн «Пермяцко-русский и русско-пермяцкий словарь». Кывчукöр петiс Санкт-Петербургын 1869 воö, эстӧн мыччалöм лунвывся наречиелöн лексика. Кывчукöрын 13000 гöгöр кыв, кöднö автор öктiс 1849-1868 воэзö. 2006 воӧ кывчукӧр вӧлі лэдзӧм вились.
Содтӧт литература:
- https://neb.nbrkomi.ru/docs/common/RU+NBRKOMIBIBL0000018407 (Н.Роговлісь 1869 вося кывчукӧр позьӧ видзӧтны быдсӧн)
[1] Коми-пермяцко-русский словарь / Р.М.Баталова, А.С.Кривощёкова-Гантман. - М.: Рус. яз., 1985. - 624 с.