Featured

Лихачёв Михаил Павлович

Лихачёв Михаил Павлович шогмис ноябрь 4 лунö 1901 воö крестьянскöй семьяын Кудымкарскöй районiсь Ёгва посадын. Ёгвинскöй двухкласснöй училище помалöм бöрын велöтчис Кудымкарскöй высшöй начальнöй училищеын, сыбöрын – Юсьвинскöй учительскöй семинарияын, кöдö помалiс 1919 воö.

1919 воö уджалiс Поносовскöй начальнöй школаын, 1920 воö вуджис Ёгвинскöй начальнöй школаö. Служитiс Гöрд Армияын, вöлi Гражданскöй войналöн участникöн.

1930 воö М.П.Лихачёв кутчисис велöтчыны Московскöй редакционно-издательскöй институтö. Велöтчикас сотрудничайтiс Центральнöй издательстволöн коми секциякöт, кытöн лэдзисö учебнöй да художественнöй литература коми-пермяцкöй кыв вылын.

1934 воö вöлi бöрйöм гижиссезлӧн медодзза Всесоюзнöй съездлöн делегатöн, кытöн сiйö примитiсö СССР-ись писателлез Союзö членнэзö. Эта съезд вылын Михаил Павлович тöдсасис Максим Горькийкöт.

Михаил Лихачёв – коми-пермяцкöй литературалöн панісь, уна вын пуктiс, мед аркмöтны коми-пермяккез понда письменность, лöсьöтны челядь да ыджыттэз понда небöггез да букваррез.

Михал Лихачёвлöн творчество пондöтчис зорамны 1923 восянь. 1928 воö сылöн петiс медодзза висьт «Виль туйöт». Но медтöдчанаöн сы творчествоын вöлi  «Менам зон» роман.

1937 воö М.П.Лихачёвöс арестуйтiсö, шуисö, что сiя контрреволюционнöй организациялöн член. 1937 воö, аслас нимлун лунö, вӧлі вийӧм. Быдöс сылöн творчество вöлi мырддьöм и сотöм. 1956 воö Михаил Павловичöс реабилитируйтiсö.

Содтӧт литература:

  1. http://kpolibrary.ucoz.ru/publ/pisateli_komi_permjackogo_okruga/likhache_mikhail_pavlovich/5-1-0-17
  2. http://enc.permculture.ru/showObject.do?object=1805344170
  3. https://e.gorkilib.ru/node/120180

 

 

 

 

 

 

Похожие статьи