Featured

Мошегова Анна Трофимовна

Анна Трофимовна Мошегова (16.02.1905-05.05.1985) чужис 1905 вося февраль 16 лунӧ Пермскӧй губерниялӧн Соликамскӧй уездісь Юсьвинскӧй волостись Белюкова деревняын крестьянин-середняк семьяын. 1922 воӧ помаліс II ступеня Юсьвинскӧй школа. 1925 восянь 1937 воӧдз уджаліс Юсьвинскӧй да Кочёвскӧй районнэзісь школаэзын учӧт классэзын велӧтісьӧн. 1938 восянь 1942 воӧдз вӧлі методистӧн, а сыбӧрын окружнӧй педагогическӧй кабинетӧн веськӧтлісьӧн. 1944 воӧдз юраліс образованнёлӧн окружнӧй отделӧн. Эта жӧ воӧ вӧлі сувтӧтӧм велӧтіссезлісь удж бурсьӧтана Кудымкарскӧй институтлӧн директорӧн (1944 – 1949). Народнӧй образованнёын уджаліс 46 во. 1954 восянь 1963 воӧдз – Коми-Пермяцкӧй книжнӧй издательстволӧн директор.

Анна Трофимовна Мошегова лоӧ коми-пермяцкӧй букварьлӧн авторӧн, кӧда вӧлі лэдзӧм 1933 воӧ и кӧда петавліс сёрӧнжык 24 пырся. 1976 вося букварьлӧн изданнё Лейпциг карын (ГДР) Международнӧй выставка вылын вӧлі пасйӧм бронзовӧй медальӧн; Всесоюзнӧй да Всероссийскӧй конкурссэз вылын художественнӧй да полиграфическӧй исполненнё понда букварьлӧ вӧлісӧ сетӧмӧсь I и II степеня дипломмез.

А.Т.Мошегова Коми-Пермяцкӧй округын медодззаэз коласын вӧлі пасйӧм «Отличник народного просвещения» знакӧн, а сідзжӧ округись народнӧй образованнё зорӧтӧмӧ, коми-пермяцкӧй кыв да литература бурсьӧтӧмӧ ыджыт пай пуктӧм понда СССР-лӧн тӧдчана датаэз кежӧ медаллезӧн да почетнӧй грамотаэзӧн.

Анна Трофимовна первӧй пондіс лӧсьӧтны национальнӧй школаэз понда велӧтчан небӧггесӧ виль алфавит основа вылын. Вӧлісӧ лӧсьӧтӧмӧсь да лэдзӧмӧсь 1, 2, 3, 4 классэз понда грамматикаэз, кӧдна сьӧрті велӧтчиссес уджалісӧ 1970 воӧдз.

Небӧггез, кӧдна вылын уджаліс А.Т.Мошегова:

Букварь. 1933 (ӧтлаын С.Ф.Грибановкӧт);

Букварь. 1937 (ӧтлаын С.Ф.Грибановкӧт, М.Д.Мысовакӧт, М.Д.Баяндинкӧт);

Букварь. 1939-46 (ӧтлаын С.Ф.Грибановкӧт , 4-ись петіс);

Букварь. 1947-73 (петіс15-ісь);

Букварь. 1976, 1978 (ӧтлаын Н.И.Тупицинакӧт, 2-ись петіс);

Коми кыв сьӧрті велӧтан небӧггез пондӧтчан школа 1-4 кл. понда (1939-81);

Роднӧй литература 5 класс понда (3-ись петіс: 1949-1957);

Роднӧй литература 7 класс понда (4-ись петіс: 1950-61);

Коми кыв программа. 1-7 кл. (2-ись петіс: 1939, 1941);

Коми-пермяцкӧй кыв сьӧрті программа. Начальнӧй школа понда (1949-57);

Кыдз велэтны грамотаэ. Букварь дынэ объяснительнэй записка. Кудымкар, 1938;

Кыдз уджавны «Роднӧй кыв» III часть книга сьӧрті. Кудымкар, 1947;

Кыдз колӧ ӧтік велӧтісьлӧ нуӧтны удж ӧткоста кык классын. Кудымкар, 1942.