Медодз коми-пермяцкöй удареннё йылісь [1] гижис Н.А.Рогов «Опыт грамматики пермяцкого языка» уджын 1860 воö. Эта уджын гижöма, что коми-пермяцкöй кыввез шуикö важнöй роль орсöны гласнöйез: а, э, ö. Кöр кылын, кöда сулалö кык либо куим слогись эм кöдакö висьталöм гласнöй, то сэк удареннё усьö сія гласнöй вылö. Например, паськыт, веськыт, курöг. Мöдік случайезын удареннё усьö медодзза слог вылö. Видзöтны кö быдöс примерресö Н.А.Рогов грамматикаись, то позьö казявны, что öтік суффикс пыр ударнöй, а мöддэс безударнöйöсь, т.е. тöдчöны морфологизированнöй удареннёлöн принциппез. Эстöн жö пантасьлöны примеррез, кытöн удареннё лоö качественно-вокальнöйöн. Например, кык слога кыввезын, одзза слогас кöдалöн сулалöны шöрись подъёма гласнöйез э, ö, о, а мöд слогас сулалö гласнöй а, удареннё усьö гласнöй а вылö – дöра, лöга, госа.
Мöдік удж, кöдаын баитсьö коми-пермяцкöй удареннё йылісь лоö И.И.Майшевлöн «Грамматика коми-пермяцкого языка», лэдзöм 1940 воö. Эта уджын учёнöй сетö быдöс ударнöй да безударнöй суффикссэз, кöдна эмöсь коми-пермяцкöй кылын. Эта описаннё почти лӧсялӧ öніся коми-пермяцкöй литературнöй удареннёкöт, но кык случайын эмӧсь торьялӧммез: 1) прилагательнöй, кöдаын эм уменьшительно-ласкательнöй суффикс -ик да 2) глагол, кöдаын эм суффикс -лывл-.
Ыджыт вын коми-пермяцкöй удареннё велöтöмын пуктіс профессор В.И.Лыткин. Коми-пермяцкöй удареннё йылісь сія гижис уна уджжез: «Об ударении в коми-пермяцком языке», 1952 во, «Диалектологическая хрестоматия по пермским языкам. С обзором диалектов и диалектным словарём», 1955 во, «Историческая грамматика коми языка. Введение. Фонетика», 1957 во, «Коми-язьвинский диалект» 1961 во и мöдіккез. Висьталöм уджжезын В.И.Лыткин гижис не только коми-пермяцкöй литературнöй кыв йылісь, но и удареннё йылісь коми-пермяцкöй диалекттэзын. Сідз, Василий Ильич. петкöтіс коми-пермяцкöй кылын куим вида удареннё: 1) морфологизированнöй, кöда видзсьö коми-пермяцкöй литературнöй кылын; 2) качественно-вокальнöй, кöдö адззам коми-язьвинскöй кылын, оньковскöй да нижне-иньвенскöй диалекттэзын; 3) тенденция сувтöтны удареннё медодзза слог вылö, кöдö панталам верхнекамскöй да севернöй диалекттэзын.
Коми-пермяцкöй удареннё йылісь уна гижис и Р.М.Баталова сэтшöм уджжезын, кыдз: «Коми-пермяцкая диалектология», 1975 во, «Ареальные исследования по восточным финно-угорским языкам», 1982 во, «Оньковсий диалект коми-пермяцкого язык», 1990 во, «Нижне-иньвенский диалект коми-пермяцкого языка» 1995 во и мöдіккез.
Профессоррез В.И.Лыткин да В.К.Кельмаков сьöрті морфологизированнöй удареннё коми-пермяцкöй кылын аркмис роч кыв влияннё увья.
[1] Л.В.Утева материал сьӧрті
