Фонетика – кыв йылісь наукалӧн тор, кӧда быд ладорсянь велӧтӧ сёрнишыэз, кӧднӧ мийӧ кылам да шуам. Быд кылын шыэз шуам ассяма, сійӧн фонетика видзӧтӧ кыдз аркмӧны шыэз, кытшӧмӧсь нія овлӧны, мый сэтшӧм удареннё, кыдз вермӧны вежсьыны шыэз, кӧр нійӧ шуам.
«Коми-пермяцко-русскӧй словарь» петіс 1985 воӧ Москваын. Ӧння кадӧ эта кывчукӧр лоӧ тырмӧмӧн и тӧдчанаӧн. Сэтчӧ пыртӧм 27 сюрся унажык кыв, кӧдна вуджӧтӧмӧсь роч кыв вылӧ.
Кывчукӧр лӧсьӧтісӧ кык коми-пермяцкӧй учёнӧй Раиса Михайловна Баталова да Антонина Семёновна Кривощёкова-Гантман. Нія керисӧ ӧддьӧн ыджыт да колана удж. Кыввез а-сянь ӧ-ӧдз ӧктіс Антонина Семёновна, кӧда уджаліс сія кадӧ Пермскӧй государственнӧй пединститутын. Раиса Михайловна, Российскӧй академияын языкознаннё институтын уджалікӧ, чукӧртіс кыввез п-сянь я-ӧдз.
Кывчукӧрын кыводзись туйӧ адззыны материал, кӧр и кытшӧм кывчукӧррез коми-пермяцкӧй кыв вылын петісӧ 18 – 19 веккезӧ.
Кывчукӧрлӧн ассямаыс и сыын, мый сэтӧн сетӧм коми-пермяцкӧй кыв йылісь грамматическӧй очерк.
Содтӧт литература:
http://komiperm.ru/komi-perm-rus_slovar (кывчукӧр быдсӧн сетӧм электроннӧй форматын)
Попов Ермолай Евдокимович[1] шогмис июль 29 лунö 1859 воö Кекур деревняын. Велöтчис Кудымкарскöй приходскöй училищеын (1864-1870). Ермолай Евдокимович служитiс велöтiсьöн Кудымкарскöй мужскöй двухкласснöй училищеын.
Ермолай Попов гижис медодзза букварь коми-пермяцкöй кыв вылын («Выддемъ пермякъ-понда». Пермь, 1894. 15 с.). 1904 воö Казаньын петiс эшö öтiк сылӧн удж – пермяцкöй школаэзын азбука и медодзза небöг лыддьöтöм понда («Выддем коми отир челядь понда». 184 с.).
Народнöй образованнёын бур уджалöм понда Е.Е. Поповöс часто ошкисö и сетавлiсö сьöм (деньга), сiдз жö сія вöлi донтӧм «За усердие» серебрянöй медальӧн.
Содтӧт литература:
- http://www.fnperm.ru/попов-ермолай-евдокимович.aspx
- https://комиокруг.рф/nasha-gordosty/popov-ermolay-evdokimovitch-1859-1917.html
- https://rusneb.ru/catalog/000200_000018_RU_NLR_DIGIT_11377/ (туйӧ видзӧтны быдсӧн 1904 вося небӧг)
[1] Гордость Пармы: биографический справочник. - Кудымкар: Коми-Пермяцкое книжное издательство, 2008. - 568 с.
18-19 векся коми-пермяцкöй кыв вылын кывчукӧррез [1]. Коми-пермяцкöй лексикографияö пондöтчöм пуктiсö учёнöй-путешественникез, кöдна пасйисö кыввез да аркмöтiсö неыджыт кывчукöррез Российскöй империялöн уна быдкодь кыввез сьöртi.
Камскöй кыв сьöртi лексическöй материал 18 векын öктöм сэтшöм источниккезын:
Г.Ф.Миллерлӧн «Собрание русской истории», Т.III, С-Петербург, 1758 вося небӧгын 358-408 листбоккез вылын öтлаын коми-зырянскöй да удмуртскöй кыввезкöт пантасьлӧны ойвывся (севернöй) диалектлöн коми-пермяцкöй кыввез.
«Дневные записки путешествия академика Лепёхина», небӧгын (куимӧт томын), кӧда петіс Санкт-Петербургын 1780 воӧ, сетöмöсь роч кыв вылö вуджöтöмöн 50 коми-пермяцкöй кыв.
Кынымкö сотня коми-пермяцкöй кыв ӧктӧм аслас уджӧ «Сравнительные словари всех языков и наречий, собранные десницею Всевысочайшей особы», кöда петiс С-Петербургын 1787 воö, академик П.С.Паллас.
Лобанова Алевтина Степановна [1] чужис июль 21 лунö 1966 воö Кудымкарскöй районiсь Шатун деревняын. Велöтчис Ярашовскöй да Верх-Иньвенскöй школаэзын.
1988 воö Алевтина Степановна гöрд дипломöн помалiс Пермскöй педагогическöй университетiсь филологическöй факультет вылiсь коми-пермяцко-русскöй отделеннё да мунiс велöтчыны одзлань Москваö языкознаннё институтö финно-угорскöй отедленнё вылö. Языкознаннё институтын Алевтина Лобанова медодз вöлi стажёрöн, а 1989 – 1992 воэзö вöлi аспирантöн Раиса Михайловна Баталова кипод увтын. 1993 воö Алевтина Лобанова дорйис кандидатскöй диссртация «Кочёвский диалект коми-пермяцкого языка» тема сьöртi.
1994 восянь öння кадöдз Алевтина Степановна уджалö Пермскöй педагогическöй университетын. Ӧння кадӧ сія юралö филологическöй факультет вылiсь коми-пермяцко-роч отделеннёöн, 2004 восянь юралö Коми-пермяцкöй кыв, история да традиционнöй культура исследуйтан институтӧн. Алевтина Степановна исследуйтӧ коми-пермяцкӧй кыв быд ладорсянь: семантика, кыв история, диалекттэз, стилистика, социолингвистика и с.о.
2015 воö Алевтина Степановналö вӧлі сетöм «Почётный работник высшего профессионального образования» званнё.
Содтӧт литература:
- https://pspu.ru/university/fakultety-i-instituty/filologicheskij/kafedry/metodiki-prepodavanija-russkogo-jazyka-i-literatury/prepodavateli-i-sotrudniki?id=3483
- https://viewer.rusneb.ru/ru/rsl01000314744?page=1&rotate=0&theme=white
3. http://uralistica.com/m/group/discussion?id=2161342%3ATopic%3A225915
[1] Лобанова Алевтина Степановна. Википедия, 2021. Электронный ресурс [https://koi.wikipedia.org/wiki/Лобанова_Алевтина_Степановна].