Удареннё [1] – этö кылын кытшöм-либо слог горöнжыка, ыджытжык вынöн шуöм.
Аслас качество сьöрті коми-пермяцкöй удареннё лоӧ ассямаӧн мöдік финно-угорскöй кыввез коласын. Унажык финно-угорскöй кыввезын удареннё сулалö определённöй слог вылын (финскöй, венгерскöй, коми-зырянскöй кыввезын – медодзза слог вылын, удмуртскöй кылын – медбöрья слог вылын). Коми-пермяцкöй кылын удареннё морфологизированнöй, сія зависитö морфемаэзсянь. Öтік морфемаэз миян кылын лоöны пыр ударнöйезöн, а мöдіккез пыр безударнöйöсь, куимöттэз – вермöны кыскыны удареннё одзаныс сулалісь слог вылö.
Удареннё почти пыр усьӧ сэтшӧм суффикссэз вылӧ:
- эманимлӧн уменьшительнöй суффикс -ок (керку-ок);
- эманимлӧн кадакывсянь аркман суффикссэз (ол-ан, верд-ас, кöрт-öт, кый-öм, уджал-ісь);
- эманиммезын суффикссэз-ӧр, -ӧс (кым-öр, кым-öс);
- нимтанлöн уменьшительнöй суффикс -ыник (том-ыник);
- нимтанлӧн суффикс -öв (небыт-öв);
- лыднимлӧн суффикс -нан да -öт (куим-нан, нёль-öт);
- кадакывлӧн суффикссэз (ю-ышт-ны, дугд-ыв-ны);
- нимтанлӧн мед- приставка (мед-ыджыт)
! Рочись пырӧм кыввезын удареннё кольччö кыдз рочас (письмо, ручка).
Коми-пермяцкöй кылын удареннёсянь вермö вежсьыны грамматическöй категория, например, сёян, быдмас – существительнöй, сёян, быдмас – глагол.
[1] Л.В. Утева материал сьӧрті
