Определеннёэз вермöны лоны однороднöйезöн и неоднороднöйезöн.

Однороднöй определеннёэзöн лоöны определеннёэз, кöдна шусьöны перечислительнöй интонацияöн, ны коласö позьö сувтöтны сочинительнöй соединительнöй союз и или да.

Видзöтö пример: Сулалö лöсьыт, мича погоддя (М.Лихачёв). Однороднöй определеннёэз лöсьыт да мича йитсьöны перечислительнöй интонацияöн, ны коласö позьö сувтöтны сочинительнöй соединительнöй союз и или да. Нiя относитчöны подлежащöй дынö погоддя, кыкнанныс сетӧны очакыв юасьöм вылö кытшöм?

Однороднöй кыввез коласын абу кӧ öтка йитан сочинительнöй союз, сэк ны коласö сувтöтсьö запятöй: Öтiк мича, гажа лунö мийö ветлiм ягöдавны.

Эта жö пунктуационнöй пасыс сувтöтсьö сэк, кöр сочинительнöй союзыс повторяйтчö: Видз вылын гажöтiсö син и гöрд, и чочком, и лöз, и веж, и зелёнöй рöммез.

Неоднороднöй определеннёэзöн шусьöны определеннёэз, кöдна сёрникузяын характеризуйтöны предметсö неöтмоза, неöтiк ладорсянь. Сэк нiя вермöны мыччавны предметлiсь признаккез, кöдна относитчöны быдкодь родовöй вежöртас дынö.

Видзöтö пример: Хозяйка сэк жö тэрмасьöмöн удалiс миянлö ыджыт пуовöй кружкаöн кöдзыт ырöш… (В.Баталов) Сёрникузяын определеннёэз ыджыт и пуовöй  характеризуйтöны кружка ыжда (размер) да материал сьöртi.

Одзас и бöрас мартовскöй лёк мороз шовкöтiс-поткöтлiс кынмöм вековöй пуэз (В.Исаев). Определеннёэз мартовскöй да лёк мыччалöны морозлiсь кад да качество, а определеннёэз кынмöм да вековöй – пуэзлiсь состояннё да кад.

Неоднороднöй определеннёэз унажыксö сетсьöны качественнöй да относительнöй нимтана сочетаннёэзöн (кöдзыт тöвся асъяпон, учöт деревенскöй керку), нимвежанöн да нимтанöн (миян виль керкуным), причастиеöн да нимтанöн (кельдöтöм арся турун).

Неоднороднöй определеннёэз коласö оз туй сувтöтны некытшöм союз.

Запятöй сувтöтсьö однороднöй членнэз коласö, если нiя йитöмась:

1. öтка противительнöй союзöн (Луныс сулалö талун кöдзыт, но мича);
2. повторяйтчана союззэзöн (Луныс талун и кöдзыт, и мича, и гажа);
3. кыкпöвса (двойнöй) союззэзöн (Луныс талун не только кöдзыт, но и мича).

Обособленнöй определеннё – этӧ определеннё, кӧдӧ вежӧртас сьӧрті торйӧтсьӧ интонацияӧн и гижикӧ мыччассьӧ пассэзӧн. Сэтшӧм определеннёэз сетӧмӧсь  нимтаннэзöн да причастиезöн.

Обособляйтчöны öтка (нераспространённöй) и распространённöй определеннёэз, кöр нiя:

1. Сулалöны определяемöй кыв бöрын: Рудкайез, сераöсь да чожöсь, лэбалiсö ферма крыша увтын. Самöй мыс йылас эм метр сувда столб, нитшсялöм да изсялöм (В.Климов).

2. Йитсьöны личнöй нимвежаннэзкöт, медбы вежöртöтны нiйö: Мийö, кынмöмöсь, чукöрöн пырим клубö шонтiсьны. Бытшöм да пыр гажа, сiя первöй пондöтiс сьыланкыв.

Причастие öтлаын зависимöй кывкöт аркмöтö причастнöй оборот, кöда обособляйтчö нiя жö условиеэз дырни, кыдз и простöй определеннё.

 Шоныта пасьтасьöм пуокыс тöвбыт оз пов кöдзыт ой тöввезiсь да тшын мороззэзiсь (В.Баталов). Пуокыс, шоныта пасьтасьöм лымовöй паськöмöн, оз пов кöдзыт ой тöввезiсь да тшын мороззэзiсь.

Вын сьӧрті висьталӧм сёрникузяэз торйӧтчӧны горӧна висьталӧм сёрникузя да негорӧна висьталӧм сёрникузя вылӧ.

Горӧна висьталӧм сёрникузяын баитісьыс мыччалӧ ассис быдкодь чувствоэз: радуйтчӧм, лӧгалӧм, тӧждісьӧм. Быдлӧн ассяма интонация.

Видзöтам примеррез: Бу-ур!.. Чудодейственнöй! — шуис сiя да шынньöвтiс (В.Климов). Ыжманыс, озъягöдыс сэтчинка - маччикан доль! А турун дукыс, вöр дукыс - сьöлöм сьылö! - ошшасис Котöрок (В.Климов).

Негорӧна висьталан сёрникузяын некытшӧм торья чувство оз мычассьы: Вöлi луншöр кад. Шондi öшалiс чуть ли не юр весьтын и сiдз пöжис, что ме люзь пымалi (И.Минин).

Междометие – этö невежласяна кыв, кöда мыччалö баитiсьлiсь быдкодь чувство (радейтöм, повзьöм, тöждöм, лöгалöм да мöдiккез) либо сигнал мортлö да подалö: чу, ох, эх, ӧнджа, кыч-кыч.

Междометиеэз ассямаöсь сiйöн, что оз относитчö не знаменательнöй, не служебнöй сёрни торрез дынö: нем оз мыччалö, оз вежласьö, оз лоö сёрникузя членöн; сёрникузяын некыдз оз йитсьö мöдiк кыввезкöт.

Ох, кытшöм басöк эд быдторсö керöмыс!

Ох, кытшöм басöк öтöрыслöн олöмыс! (А.Зубов)

Вежöртас сьöртi торйöтчöны кык чукöр вылö:

   1.  междометиеэз, кöдна мыччалöны быдкодь чувствоэз: ок! ох! ого! ура! уф! ой! а-а! эй! тш! т-с-с! о-о! ау, эх! маш, эк, иш, ыш! эк! тьфу! да мöдіккез.

Например: Иш тэ, чöскыта бы сёян (М.Лихачёв). Ура! Каникуллэз пондöтчисö! Чу, кинлöнкö кылöны оськöввез. Ого, тшакыс мымда!

   2.  междометиеэз, кöдна мыччалöны тшöктöммез морт да пода действиеэз понда (корöм): аттьӧ, бур вылӧ, чочком, кс-ссс, кыш, куть-куть, гулю-гулю, тпру-у, кч-кч, баль-баль, Не! Да! Алло! Марш! Но-о?! .

Повторяйтчана междометиеэз гижсьöны кырöлок пыр: ыш-ыш, эк-эк-эк, кыс-кыс, чив-чив, ку-ку, о-о, ко-ко.

Сёрникузяын междометие бöрын сувтöтсьö запятöй: Ох, золотöй ид тусь тэ менам дона зонiньöй!.. (М.Лихачёв) Ох-ох, спасибо добрöй докторлö, отсалiс невночка (И.Минин).

Ежели междометие висьталӧм вынöн, то сы бöрö сувтöтсьö горӧтан пас:  Йирк-ёрк, ёркöток, дорö туввез молоток (В.Климов).