Кӧр сложнӧй сёрникузяын простӧй сёрникузяэз йитсьӧны быдкодь союззэзӧн (а, но, кӧр, и, да), то сёрникузяын союз одзын пуктіссьӧ запятӧй.

Видзӧтам примеррез: Ойнас ру эшӧ сайкавлӧ, а луннас шонді ни серавлӧ.

Шонді петіс, и лун пондӧтчӧ.

Бур погоддяыс сулалӧ, кӧр пӧжӧ шонділӧн югӧр.

Многоточие (…) – препинаннё пас, кöда мыччассьö куим сьöрсьöн-бöрсьöн сувтöтöм точкаöн. Этö пассö сувтöтам сэк, кöр мыччалам бы сёрнилiсь орöтöм, не быдöс висьталöм или текстiсь мыйкö кольöм.

Видзöтам примеррез: Иньва дорын эм керöс, сэтöн дзульзьö поснит йöз: кöда кайö, кöда лэдзчö, кöда усьö, кöда чеччö… (Эстӧн тыдалӧ, что не быдӧс авторыс висьталӧм, сідз кыдз эшӧ туйис бы мыйкӧ содтыны, сійӧн сёрникузя помын пуктӧм многоточие).

Рытывбыт лоток ёркöтö… (В.Климов) (Сёрникузяыс думаыс оротӧм, сійӧн автор бӧрйӧм многоточие пуктӧм).

Пунктуация – ӧткӧ,  кыв наукалӧн тор, кӧда велӧтӧ препинаннё пассэз да  сёрникузяын препинаннё пассэсӧ сувтӧтӧм;  мӧдкӧ, препинаннё пассэзлӧн система.

Начальнӧй школаын велӧтчиссез тӧдсасьӧны сэтшӧм препинаннё пассэзӧн: точка [.], запятӧй [,], горӧтан пас [!], юасян пас [?], кавычкаэз [« »], скобкаэз [ ( ) ], многоточие […].

Быд паслӧн сёрникузяын аслас мог, кӧда отсалӧ вежӧртны  лыддьӧтісьлӧ и гижисьлӧ сёрникузяэз и тексттэз.

Кавычкаэз (« ») – препинаннё пас, кöда пуктіссьӧ сказкаэзлӧн, спектакллезлӧн, газетаэзлӧн, журналлэзлӧн ниммез гижикӧ: Миян театрын сувтӧтӧны чужан кыв вылын спектакллез «Гузи да Мези», «Куим  ӧткодь», «Ӧштӧм синтӧмыс пӧлян». Пермскӧй крайын петӧ челядь понда «Сизимок» журнал. Айӧ йылісь гижисӧ «Парма» газетаын.