Коми-пермяцкöй кылын дассизим (17) падеж. Быд падежын эманим сетö очакыв кытшöмкö öтiк юасьöм вылö.

Кин? юасьöм вылö сетӧны очакыв одушевлённöй эманиммез, кöдна сетöны ним отирлö, вöрпилö, вöрпöткалö: вон, нылочка, пон, руч, рудкай.

Мый? юасьöм сувтöтсьö неодушевлённöй эманиммез дынö: кöз, кок, керку, пызан, туй.

! Не пыр быдöс эманиммез вермасö вежласьны быд падежын. Одушевлённöй эманиммез сьöкыта босьтöны местнöй (местнöй, вступительнöй, исходнöй, предельнöй, переходнöй) падежжезлiсь формаэз.

Быд падежлӧн эм аслас вежӧртас.

Именительнӧй падеж мыччалӧ предметлісь ним: Нылочкаэз тэрмасьӧмӧн ӧктісӧ ягӧд.

Родительнӧй падеж мыччалӧ кӧдалӧн сія предметыс или явленнёыс: Кольö дона чужанiнлöн Ласков, небыт шыа гор (Г. Бачева)

Притяжательнӧй падеж мыччалӧ предмет, кӧдалӧн мӧд предметыс:  Риталісь корим нянь.  Кыдззезлiсь чикиссез Ласков тöв путшöтö. (Г. Бачева)

Дательнӧй падеж мыччалӧ кин или мый вылӧ иньдӧм или сетсьӧ мӧд предметыс: Медбур уджалісьлӧ сетісӧ почётнӧй грамота.

Винительнӧй падеж мыччалӧ предмет, кӧда вылӧ вуджӧ действие: Велӧтіссез керисӧ гортся удж.

Творительнӧй падеж мыччалӧ: 1) орудие, инструмент, кӧдӧн мыйкӧ керӧны: Мусӧ гӧрисӧ тракторӧн; 2) кыдз мунӧ действиеыс: Шогдіыс зарниа рӧмӧн пежьялӧ; 3) мера, количество: Челядь тшаксӧ ӧктісӧ быдса ведраӧн; 4) профессия, специальность: Вонӧ уджалӧ вузалісьӧн.

Соединительнӧй падеж мыччалӧ предмет, кӧдакӧт ӧтлаын керӧ действиесӧ мӧдік предмет:  Сойӧ мамӧкӧт уджалӧны виль проект вылын.

Лишительнӧй падеж мыччалӧ лицо либо предмет, кӧдатӧг мыйкӧ керӧ мӧдік предмет: Мамыстӧг Олег ӧддьӧн гажтӧмтчис.

Сравнительнӧй падеж мыччалӧ предмет, кӧдакӧт ӧрдчӧтам мӧдік предмет: Шонді унаись ыджытжык Тӧлісься.

Достигательнӧй падеж мыччалӧ предмет, кӧда понда керсьӧ действиеыс: Ме ветлі библиотекаӧ книгала.

Местнӧй падеж мыччалӧ предмет, кӧда пытшкын эм мӧдік предмет: Челядь орсӧны садын.

Исходнӧй падеж мыччалӧ предмет, кӧдаись петӧ мӧдік предмет, нето материал, мыйись керӧма предметыс: Ручлӧн керку вӧлӧма йыись, а кӧчлӧн пуись.

Вступительнӧй падеж мыччалӧ 1) предмет, кӧда пытшкӧ иньдӧтӧма мӧдік предметлӧн действиеыс: Школаӧ вайисӧ виль небӧггез; 2) кад: Кольӧм годӧ урожайыс вӧлі бур.

Приблизительнӧй падеж мыччалӧ предмет, кӧдалань иньдӧтчӧ мӧдік предмет: Челядь котӧртісӧ школалань.

Отдалительнӧй падеж мыччалӧ: 1) предмет, кӧда дынсянь мунӧ, вешшӧ мӧдік предмет: Вонӧсянь получиті письмо; 2) кад, кӧдасянь пондӧтчӧ действиеыс нето состояннёыс: Майсянь трактористтэз уджалісӧ ыб вылын.

Переходнӧй падеж мыччалӧ предмет, кӧда кузя (вылӧт, пытшкӧт) мунӧ мӧдік предмет: Маша муніс вӧрӧт.

Предельнӧй падеж мыччалӧ предмет, кӧда лоӧ пределӧн мӧдік предмет мунӧм понда: Таво шогдіыс быдмис моросви.

 

 

 

 

Орфоэ́пия (аркмис др.-греч. ὀρθός «правильнöй» и ἔπος «речь») — устнöй да письменнöй сёрнилöн правилоэз, кöдна пыртöмöсь литературнöй кылын. Правильнöй литературнöй сёрни отсалö отирлö баитiкö кокнитжыка вежöртны öтамöдöс.   

Медшöр орфоэпическöй правилоэз:

1. Коми-пермяцкöй сёрни лоö лайкыт, ударнöй слогын гласнöйес шусьöны вынöнжык.
2. Гора согласнöйез коми-пермяцкöй кылын шусьöны не только гласнöйез одзын, но и кыв помын. Кыв помын гора согласнöй шыэз оз пöрö гусяэзö: ныв, вöв, кыдз, кыз, гаг и с.о.

Но кöр гора согласнöйез сулалöны гуся согласнöйез одзын, нiя пöрöны гусяэзö: содтыны (шуам соттыны), а гуся согласнöйез гораэз одзын пöрöны гораэзö: Öтдор (шуам öддор).

3. -ышт, -öсьт кадакывлӧн суффикссэзын т оз шусьы: гижыштны (шуам гижышны), нятьöсьтны (шуам нятьöсьны). Т шусьö только мукöд кадакывлӧн формаэзын гласнöйез одзын: гижышта, нятьöсьта.
4. Орфографическöй т оз шусьы кыввезын: осьтны (шуам осьны), кисьтны (шуам кисьны), босьтны (шуам босьны), но шонтны, лонтны и с.о.
5. -Тч, -дч, -дзч согласнöйез сочетаннёын шусьö -чч: гижсьö вöтчыны (шусьö вöччыны), видчыны – виччыны, лэдзчыны – лэччыны.
6. Роч кылiсь важ заимствованнёэз шусьöны коми-пермяцкöй орфоэпическöй нормаэз сьöртi: кöш, дöва, гöсь, кöть и с.о.

 

 

 

Быд кылын сёрнишыэз сулалöны определённöй порядокын [1]. Любöй шы оз вермы сулавны ордчöн быд мöдік шыкӧт. Сідз, коми-пермяцкöй кылын озö вермö сулавны ордчöн кык либо унажык согласнöй либо гласнöй, кыввез озö помассьö [о] шы вылö. Быд кылын шы тöдö ассис места, вермö сулавны ордчöн определённöй шыкöт. Например, коми-пермяцкöй литературнöй кылын согласнöй в оз вермы сулавны кыв шöрын гласнöй одзын.

Быдöссö, коми-пермяцкöй кылын пантасьлöны 41 % - гласнöйез, а согласнöйез – 59 %. Гласнöйез коласісь медунаись пантасьлö фонема [ö] (8 %), [а] (7,18 %), [ы] (5,49) и мöдіккез.

Согласнöйез коласісь [с] (8,26 %), [н] (6,85 %), [т] (6,04 %), [к] (4,8 %) и мöдіккез.

Коми-пермяцкöй кылын одзза слогын вермöны пантасьны быд гласнöй, например, кужны, вермыны, гижны, кага и мöддэз. Неодзза слогын шочажык пантасьлöны гласнöйез: о, у, ö, э.

Унажык согласнöйез коми-пермяцöй кылын вермöны пантасьны быд позицияын: кыв подöтчикö, кыв шöрын и кыв помын. Согласнöйез т', д', з' ӧддьӧн шоча туйӧ адззыны кыв пондӧтчикӧ. Нія вермöны пантасьны изобразительнöй да пырӧм кыввезын (динь-динь, зеркало, дед).

Коми-пермяцкöй кылын шыэз етшажык вермöны вежны ассиныс качество, озö вуджö мöдік шыö лоöны кö нія ударнöйезöн либо безударнöйезöн.

Кыв пондöтчикö вермас сулавны öтік гласнöй либо öтік согласнöй, но шоча вермöны сулавны ордчöн кык гласнöй либо кык согласнöй: квать, трин-трон.

Кыв помын вермöны пантасьны быд согласнöй шы, исключеннёöн лоö [л].

Коми-пермяцкöй литературнöй кылын в да л шыэз чередуйтчöны, а именно, шы л, кöда сулалö кыв шöрын гласнöй одзын вуджö в шыö кыв шöрын согласнöй одзын да кыв помын. Эта чередованнё увтö озö шедö сэтшöм кыввез: а) звукоподражательнöй кыввез (чивöстіс); б) сложнöй кыввез (синва); в) роч заимствованнёэз (стул, колхоз); г) роч суффикс      -овöй (пуовöй).  

Кыв шӧрын ордчöн сулалісь шыэз коласісь öтікыс вермас керны аскодявны бокись шысö: модӧтчыны, но [мӧдӧччыны], содтыны [соттыны].

 

 

 

 

 

 

[1] Материал лӧсьӧтӧм Л.В.Утева статья сьӧрті

Кöр гора согласнöйез сулалöны гуся согласнöйез одзын, нiя пöрöны гусяэзö: содтыны (шуам соттыны), а гуся согласнöйез гораэз одзын пöрöны гораэзö: Öтдор (шуам öддор).

 

-ышт, -öсьт кадакывлӧн суффикссэзын т оз шусьы: гижыштны (шуам гижышны), нятьöсьтны (шуам нятьöсьны). Т шусьö только мукöд кадакывлӧн формаэзын гласнöйез одзын: гижышта, нятьöсьта.

 

Орфографическöй т оз шусьы кыввезын: осьтны (шуам осьны), кисьтны (шуам кисьны), босьтны (шуам босьны), но шонтны, лонтны и с.о.

 

-Тч, -дч, -дзч согласнöйез сочетаннёын шусьö -чч: гижсьö вöтчыны (шусьö вöччыны), видчыны – виччыны, лэдзчыны – лэччыны.

 

Кӧр чорыт согласнӧй сулалӧ ордчöн небыт согласнöйкӧт, то шуикӧ одзись согласнӧйыс шусьӧ небыта: керöссянь (шусьӧ кэрöсьсьань).