Неологизммез – виль кыввез или сёрнилӧн обороттэз, кӧдна аркмисӧ кылын виль предметтэз, явленнёэз, виль понятиеэз висьталӧм понда. Терминыс аркмис neos – «виль» и logos – «кыв» греческӧй кыввезісь.
Талун неологизммезӧн миян кыв паськалӧ пырӧм кыввез пыр: компьютер, гаджет, смартфон, хот-дог.
Лексика – этӧ быдӧс кыввез, кӧдна эмӧсь кылын. Мӧднёж шуӧмӧн – словарнӧй состав.
Лексикон – мортлӧн кыв запас.
Кыв – этӧ кывлӧн медучӧт единица, кӧдалӧн эм аслас лексическӧй да грамматическӧй вежӧртас (либо вежӧртассэз).
Быд кывлӧн торья кыввез аркмӧтӧны лексика: роч кыввез аркмӧтӧны роч кывлісь лексика, коми-пермяцкӧй кыввез аркмӧтӧны коми-пермяцкӧй кывлісь лексика.
Коми-пермяцкӧй лексика зорамис не ӧтік век сьӧрна, сійӧн сія ассяма, аскоддя, оз вачкись мӧдік кыввез вылӧ. Вежсьӧ олан, вежсьӧ и кывлӧн словарнӧй состав. Сэтчӧ пырӧны виль вежӧртассэз, а сідзкӧ, и виль кыввез; мукӧдыс важмӧны, мукӧдыс вежӧны ассиныс вежӧртас, пыртӧ мӧдік отирлісь кыввез.
Важмӧм лексика – этӧ кыввез, кӧдна употребляйтчӧны сёрниын, но нійӧ вежӧртӧны кыдз важмӧм кыввез.
Важмӧм кыв (историзм) – кыв, кӧда ӧшис сёрниись ӧтлаын предметкӧт либо явленнёкӧт.
Кывчукӧрын эмӧсь кыввез, кӧдна важмӧны, петӧны морт сёрниись, дугдӧны « уджавны кыв вылӧ», одзлань вунӧтсьӧны. Лоӧ этадз сэк, кӧр морт оланісь мунӧ предмет, а сыкӧт ӧтлаын и предметсӧ мыччалан кылыс.
Эшӧ неважын кузь чикися инькаэз да ичмоннез ассиныс юрси сынавлісӧ зуӧн. Талун зу, кыдз юрси сыналан предмет, позьӧ адззывны музейын. Сы туйӧ отир пондіс юрси волькӧтан предметсӧ шуны сынанӧн. Сынаннэз лоисӧ челядь понда, инькаэз да зонкаэз понда. Сідз туйӧ и висьтасьны нинкӧм кыв йылісь, кӧда йитӧм коми отирлӧн важ кӧмкӧтӧн. Нинкӧм кыдз кӧмкӧт ӧні оз новйӧ, мыччассьӧны нинкӧммез музейын да дзебӧмӧсь чомйын.
Диалектнӧй кыввез – этӧ кыввез, кӧдна пантасьӧны кытшӧмкӧ ӧтік местаын. Например: кыввез мӧдӧтны, орасьны, чилькӧтны, няп олӧны сёрниын Кочёвскӧй районісь оліссез коласын. Кудымкарскӧй районісь оліссез эна вежӧртасын висьталасӧ мӧдік кыввез: кольлавны, весӧтчыны, высьтыны, жельнӧг. Юсьвинскӧй районын общеупотребительнӧй кыввез туйӧ: куран, рос, мыр мукӧд посадын висьталасӧ кыввез: нарман, гӧлик, мырӧв. Сэтшӧм кыввез шусьӧны лексическӧй диалектизммезӧн.
Антониммез – этӧ паныта вежӧртаса, ӧткодь сёрни торреза кыввез.
Видзöтö примеррез: чочком – сьöд, ыджыт – учöт, мунны – сулавны.
Паныт вежӧртаса кыввез отсалӧны висьтавны думаэз, басӧксьӧны сёрни.
Асланыс вежӧртас сьӧрті антониммез мыччалӧны:
