Статьи

Парнöй кыввез

КПИПКРО Лексика 28 ноября 2021 Просмотров: 390

Парнöй кыввез – этö сложнöй лексическöй единицаэз, кöдна сулалöны кык öткодь грамматика ладорсянь торрезiсь: ая-зона, пемыт-гӧрд, мунны-локны.

Парнöй кыввез аркмöны торья кыввезсянь: катша-рака = катша и рака.

Парнöй кыввезлöн торрез вермӧны лоны:

Синониммезöн: öгравны-сотчыны, таравны-усьны, рявзыны-горöтлыны;
Антониммезöн: мунны-локны, серавны-горзыны;
Торья кыввезӧн: ая-зона, сьывны-йöктыны, сийöс-сермöт.

Парнöй кыввезӧн лоӧны быдкодь сёрни торреза кыввезӧн:

эманиммез: мама-ныла, йöрнöс-вешьян, ном-лöдз.

кадакыввез: удны-вердны, чильдны-кынмыны, сярзьыны-баитны, баитны-керны, пукавны-керны.

Коми-пермяцкöй кылын парнöй кадакыввез пантасьöны тшöка. Кыкнан компонентыс вежласьö кад, лицо да лыд сьöртi: тапикасьны-мунны – тапикаси-муні – тапикасьӧ-мунӧ.

нимтаннэз:

нимтаннэз, кöдна мыччалöны предметлiсь признак мöдiк предмет пырйöт: чукыля-викыля, сюра-пеля;
нимтаннэз, кöдна мыччалöны рöм: югыт-лöз, пемыт-гöрд.

урчитаннэз: сьöрсьöн-бöрсьöн, тырöн-гозйöн.

лыданиммез: кык-куим, öтiк-кык.

Частожык пантасьöны парнöй лыданиммез, кöдна аркмöны дасöдз.

Колӧ висьтавны, мый парнӧй кыввез пыдына видзӧтіс аслас уджжезын А.С. Кривощёкова-Гантман.

Омониммез

КПИПКРО Лексика 28 ноября 2021 Просмотров: 401

Омониммез – этӧ кыввез, кӧдна неӧткодьӧсь вежӧртас сьӧрті, а шусьӧны да гижсьӧны ӧтмоза.

Омониммез коми-пермяцкӧй кылын овлӧны кыдз ӧтік, сідз и не ӧтік сёрни торӧн. Омониммесӧ позьӧ вежӧртны только сёрниын, текстын.

Видзöтö пример: кöр – этö кад юалан кыв. Кыв кöр пыртам сёрниö сёян-юан йылiсь баитiкö. Кöрöн эшö шуöны учöтик бабылокöс, кöда тшыкöтö паськöм. Кöр – олень.

Синониммеза кывчукӧр

КПИПКРО Лексика 28 ноября 2021 Просмотров: 387

Коми-пермяцкӧй кывлӧн синониммезӧн кывчукӧр лэдзӧм медодззаись Кудымкарын 2017 воӧ. Чукӧртісӧ сійӧ Нина Егоровна Бражкина да Татьяна Николаевна Меркушева. Кывчукӧр лӧсьӧтӧм 1-9 классэзын велӧтчиссез понда. Сэтчӧ ӧктӧмӧсь и пыртӧмӧсь синониммез, кӧдна пантасьлӧны быдкодь велӧтчан небӧггезын.

Синониммез чукӧртӧмӧсь синонимическӧй виззезӧ. Медодззанас пуктӧм сэтшӧм кыв, кӧда паськыта и унажык пантасьлӧ быд сёрнитан стильын, сылӧн вежӧртасыс паськытжык мӧдік кыввезся: бур – бытшӧм – кодя – долыт – мича.

Быд кыв дынӧ вайӧтӧм коми-пермяцкӧй художественнӧй литератураись пример:

АСКОДДЯ – АССЯМА

Эстӧн айӧ и шулялӧ-гӧрӧ му, кӧда лолалӧ аскоддя уль руӧн. (С.Ф.) Мый бы эн шу, а Гублян – ассяма, асруа, асвужья посад, кӧть и, видзӧтан да, вачкисьӧ мыйӧнкӧ Ошыб вылӧ, Сер вылӧ, Йӧг вылӧ. (В.К.)

Примеррез пантасьлӧны быдкодь грамматическӧй формаэзын. Шуам, шедны кыв дынӧ вайӧтӧм сэтшӧм пример: Учӧтик ӧшынокӧт избушка пытшкас югытыс шедіс етша. (Т.Ф.)

Синонимическӧй визьӧ пырӧны ӧтік сёрннторись кыввез.

Аслас вежӧртас сьӧрті ӧтік и сія жӧ кыв вермас пантасьлыны неӧтік синонимическӧй визьын.

Кывчукӧр лӧсьӧтікӧ материал вӧлі ӧктӧм 1985 вося Р. Баталова да А. Кривощёкова-Гантманлӧн «Коми-пермяцко-русскӧй словарь» да 1993 вося «Коми-пермяцко-русскӧй, русско-коми-пермяцкӧй словарь» сьӧрті.