Быдӧс шыэз торйӧтсьӧны гласнӧйез да согласнӧйез вылӧ, нылӧн эм уна ассямаыс.

Гласнӧй шыэзлöн ассямаыс: шуикӧ ӧм пытшкын некытшӧм преграда абу. Сысянь мыля ӧм пытшкын преграда абу, легкоэзысь ру петӧ кокнита, шогмӧ шы.  

Согласнӧй шыэзлöн ассямаыс: шуикö ӧм пытшкын эм преграда, этасянь  ру петӧ вынӧн, тойыштӧмӧн.

Сёрнишыэз аркмӧны мортлӧн сёрнитан органнэзӧн: лёгкоэз, лолалан горш, кавтык, ӧм пытшк да ныр пытшк, пиннез, тырппез да кыв.

Сідз, медбы аркмис сёрнишы [и], ӧмись рулӧ колӧ петны лолалан горшӧт. Эта коста тырппез невна осьтаӧсь, ӧмын кыв куйлӧ чуть матынжык пиннезлань.

Уна вежӧртаса кыввез – этӧ кыввез, кӧдналӧн эм не ӧтік вежӧртас: кайны кытчӧкӧ вылӧ и кайны температуралӧ.

Кӧр кылыслӧн кынымкӧ вежӧртас, сэк ӧтікыс лоӧ веськыт вежӧртасӧн, а мӧдыс или мӧддэс – невеськыт (ӧсь):

кайны кытчӧкӧ вылӧ – веськыт вежӧртас; а  кайны температуралӧ – невеськыт.

Фразеология – кыв йылісь наукалӧн тор, кӧда велӧтӧ топыта йитӧм кыввез.

Термин фразеология аркмис греческӧй phrásis «выражение» да lógos «слово, учение» кыввезісь.

Коми-пермяцкӧй кылын, кыдз и мӧдік кыввезын, эмӧсь сэтшӧм кывтэчассэз, кӧдна мыччалӧны ӧтік вежӧртас. Ныын кыввез топыта йитӧмӧсь, оз туй вежны нылісь порядок, оз туй чапкыны сэтісь либо пыртны сэтчӧ мӧдік кыв; кыввес, ӧтамӧдкӧд йитсикӧ, сетӧны виль вежӧртас. Сэтшӧм кывтэчассэз шусьӧны фразеологизммезӧн либо топыта йитӧм кыввезӧн.

Топата кывтэчассэз (фразеологизммез) аркмисӧ не ӧтік век сьӧрна, сійӧн пыртӧны ас пытшкӧ отирӧн ӧктӧм ыджыт олан опыт. Нія сетӧны тӧдӧммез быдса народлӧн кыв, история да культура йылісь.

Мортлӧн олан коми-пермяцкӧй фразеологизммезын мыччассьӧ быд ладорсянь, ныын петӧ сылӧн удж, думаэз, бур да умӧль качествоэз, радейтӧм. Мортлісь качествоэз мыччалӧны фразеологизммез: кузь киа, тӧртӧм мӧс; асьсӧ видзӧм отир син одзын : юр пельпон вылын новйӧтӧ, ки нюжӧтіс; мера вылӧ мыччалӧны: кузь верзень, ачыс ыджыт и учӧт; удж дынӧ отношеннё: чунь оз пукты, зарни киа.

Сёрникузяын фразеологизммез быдсӧн лоӧны кытшӧмкӧ ӧтік сёрникузя членӧн.

Топыта йитӧм кыввез употребляйтчӧны сы понда, медбы сёрни вӧлі образнӧй, выразительнӧй, вежӧртана. Быд кылын нія ассямаӧсь, аскодяӧсь. Сійӧн нійӧ не пыр туйӧ вуджӧтны мӧдік кыв вылӧ.

Кыдз пасйӧ филология наукалӧн кандидат О.А. Попова, кывсеррез кыдз тодильнӧй (специальнӧй) элементтэз коми-пермяцкӧй кылын вӧлісӧ пыртӧмӧсь «Коми-пермяцко-русскӧй кывчукӧрын» (1985), кӧдӧ лӧсьӧтісӧ Р.М. Баталова да А.С. Кривощёкова-Гантман.

1993 воӧ Коми-Пермяцкӧй округись национальнӧй школаэз понда вӧлі лэдзӧм «Коми-пермяцко-русскӧй и русско-коми-пермяцкӧй словарь», кӧдӧ лӧсьӧтісӧ Г.И. Немтинова, В.В. Федосеева да Л.Ф. Яркова. Эта кывчукӧр дынӧ сетӧм неыджыт содтӧт: «Фразеологизммез».

В.В. Климов «Олан вужжез» (Корни бытия) (2007) небӧгын, «Фразеологизммез» юкӧтас мыччалӧм гижисьыслӧн уна годся удж коми отирлісь кывсеррез ӧктӧм сьӧрті.

Научнӧй анализ коми-пермяцкӧй фразеологизммезлӧ, кыдз ассяма кыв торрезлӧ, первуись вӧлі сетӧм А.С. Кривощёкова-Гантманӧн вузовскӧй учебникын «Коми-пермяцкий язык» (1962).

1999 воӧ Ижкарын О.А. Гагарина (Попова) дорйис «Фразеология коми-пермяцкого языка» тема сьӧрті кандидатскӧй диссертация.

Синониммез – этӧ кыввез, кӧдна матынӧсь асланыс вежӧртас сьӧрті, но неӧткодьӧсь гижӧм да шуӧм сьӧрті.

Видзöтö пример: баитны – висьтасьны, горзыны – сыркьявны, чочком – югыт.

Синониммез употребляйтчӧны связнӧй сёрниын сы понда, медбы нія керисӧ сёрнисӧ точнӧйжыкӧн, выразительнӧйжыкӧн, басӧкжыкӧн, а сідзжӧ медбы эз вӧлӧ повторрез.