Кривощёкова-Гантман Антонина Семёновна [1] чужис август 17 лунö 1921 воö Юсьвинскöй районiсь Вижелова деревняын Семён Михайлович да Мария Фёдоровна Кривощёковвез семьяын.

1935 воö помалiс Архангельскöй семилетньöй школа, 1938 воö – Кудымкарскöй педагогическöй училище. Педучилище помалöм бöрын уджалiс медодзза номера Кудымкарскöй челядь садын воспитательöн.

1930 воö Антонина Кривощёкова поступитiс А.А.Жданов нима Ленинградскöй государственнöй университетö восточнöй факультетлöн финно-угорскöй отделеннё вылö. Велöтчöмлö мешайтiс Великöй Отечественнöй война. 1941-1942 воэзö Антонина Семёновна уджалiс блокаднöй Ленинградын медицинскӧй сестраöн.

1942 воö бертiс округö, кутчисис велöтны история уроккез Кудымкарскöй мӧдік номера школаö. Война бöрын, 1945 воö, мунiс велöтчыны Ленинградö. 1947 воö Антонина Семёновна поступитiс аспирантураö, кöдö помалiс 1950 воö. Февраль 23 лунö 1962 воö Дмитрий Владимирович Бубрих юралöм увтын дорйис кандидатскöй диссертация «Словарный состав и словоизменение иньвенского диалекта коми-пермяцкого языка» тема сьöртi. Этö вöлi медодзза диссертация коми-пермяцкöй кыв материал вылын. Аспирантура помалöм бöрын А.С.Гантман бертiс Коми-Пермяцкöй округö.

Округын пондöтчис уджавны методистöн Коми-Пермяцкöй окружнöй велöтiссезлiсь удж бурсьöтан институтын, сыбöрын заведуйтiс роч да коми-пермяцкöй кыввез сьöртi кафедраöн. 1952 воö А.Гантман вуджис уджавны Кудымкарскöй учительскöй институтö, кытöн уджалiс 1955 воöдз. Сэк Антонина Семёновна лöсьöтiс учебнöй планнэз да программаэз, школьнöй небöггез, методическöй пособиеэз велӧтіссез понда.

  Тудвасева Зинаида Константиновна – коми-пермяцкöй лингвист, педагогическöй наукаэз сьöртi кандидат, коми-пермяцкöй кыв сьöртi ведущöй методиcт.

Зинаида Константивна чужис октябрь 5 лунö 1947 годö Юсьвинскöй районiсь Урманова деревняын. Велöтчис Крохалёвскöй восьмилетньöй школаын да Купросскöй шöрöт школаэзын.

1972 годö Пермскöй государственнöй педагогическöй институт филологическöй факультет коми-роч отделеннё велöтчöм бöрын поступитiс РСФСР-ись образованнё сьöртi Министерствоын национальнöй школаэз понда научно-исследовательскöй институтö. Уджалiс НИИ-ын старшöй научнöй сотрудникöн. Сiя жö кадö велöтчис аспирантураын и 1975 годö дорйис кандидатскöй диссертация «Послелоггез коми-пермяцкöй кылын и нiйö велöтан методика» тема вылö.

Учёнöйöс интересуйтö финно-угорскöй кыввезлöн зорамöм, билингвизм сьöртi проблемаэз. Зинаида Константиновна уна годдэз уджалö коми-пермяцкöй кыв сьöртi программаэз вылын, национальнöй школаэз понда велöтчан пособиеэз да небöггез вылын, методическöй пособиеэз лöсьöтöм вылын. Сы кипод увтын петiсö неӧтік дас научнöй публикация.

Баталова Раиса Михайловна [1] – тöдса коми-пермяцкöй учёнöй, специалист пермскöй кыввез сьöртi – филолог, велöтiсь, диалектолог, лексикограф, Российскöй академия наукись языкознаннё сьöртi институтiсь уджалiсь.

Раиса Михайловна шогмис август 10 лунö 1931 воö Юсьвинскöй районiсь Рудакова деревняын колхозниккез семьяын. Айыс, Боталов Михаил Григорьевич (1909-1968), 1935 воö уджалiс районнöй служащöйöн, а мамыс, Боталова (Постоногова) Мария Алексеевна (1909-1979), пенсияöдз уджалiс колхозын.

Антипинскöй школа помалöм бöрын Р.М.Баталова поступитiс Кудымкарскöй педагогическöй техникумö, кöдö помалiс 1951 воö. 1954 воö поступитiс историко-филологическöй факультет вылö Коми педагогическöй институтö (г. Сыктывкар).

1962 воö дорйис кандидатскöй диссертация «Оньковский диалект коми-пермяцкого языка в сравнительно-историческом плане» тема сьöртi.

Языкознаннё институтын уджалiкö, Р.Баталова вöлi младшöй научнöй сотрудникöн, а сыбöрын лоис медшöр научнöй сотрудникöн.

1998 воö Раиса Михайловна дорйис докторскöй диссертация «Диалектная система коми-пермяцкого языка в сравнительном и ареальном освещении» тема сьöртi.

Коми-пермяцкӧй кылын сизим (7) гласнӧй шы. Гласнӧй шыэз шуикӧ ру петӧ ӧмись падмавтӧг.

Гласнӧй шыэз

Гижикӧ шыэз мыччалам шыпассэзӧн. Гласнӧй шыпассэз коми-пермяцкӧй кылын даскык (12): а, е, ё, и, і, о, ӧ, у, ы, э, ю, я.

Шыэз да шыпассэз

Видзӧтам пример: Кылын нянь гижам я, кӧда небзьӧтӧ одзись шысӧ, а лыддьӧтам [а] → [нʼанʼ].

Кылын яй гижам я, но лыддьӧтам [йʼа] → [йʼайʼ].

Кылын ай гижам а и лыддьӧтам [а] → [айʼ].