Кривощёкова-Гантман Антонина Семёновна [1] чужис август 17 лунö 1921 воö Юсьвинскöй районiсь Вижелова деревняын Семён Михайлович да Мария Фёдоровна Кривощёковвез семьяын.
1935 воö помалiс Архангельскöй семилетньöй школа, 1938 воö – Кудымкарскöй педагогическöй училище. Педучилище помалöм бöрын уджалiс медодзза номера Кудымкарскöй челядь садын воспитательöн.
1930 воö Антонина Кривощёкова поступитiс А.А.Жданов нима Ленинградскöй государственнöй университетö восточнöй факультетлöн финно-угорскöй отделеннё вылö. Велöтчöмлö мешайтiс Великöй Отечественнöй война. 1941-1942 воэзö Антонина Семёновна уджалiс блокаднöй Ленинградын медицинскӧй сестраöн.
1942 воö бертiс округö, кутчисис велöтны история уроккез Кудымкарскöй мӧдік номера школаö. Война бöрын, 1945 воö, мунiс велöтчыны Ленинградö. 1947 воö Антонина Семёновна поступитiс аспирантураö, кöдö помалiс 1950 воö. Февраль 23 лунö 1962 воö Дмитрий Владимирович Бубрих юралöм увтын дорйис кандидатскöй диссертация «Словарный состав и словоизменение иньвенского диалекта коми-пермяцкого языка» тема сьöртi. Этö вöлi медодзза диссертация коми-пермяцкöй кыв материал вылын. Аспирантура помалöм бöрын А.С.Гантман бертiс Коми-Пермяцкöй округö.
Округын пондöтчис уджавны методистöн Коми-Пермяцкöй окружнöй велöтiссезлiсь удж бурсьöтан институтын, сыбöрын заведуйтiс роч да коми-пермяцкöй кыввез сьöртi кафедраöн. 1952 воö А.Гантман вуджис уджавны Кудымкарскöй учительскöй институтö, кытöн уджалiс 1955 воöдз. Сэк Антонина Семёновна лöсьöтiс учебнöй планнэз да программаэз, школьнöй небöггез, методическöй пособиеэз велӧтіссез понда.
1955 восянь Антонина Семёновна семьянас мунiс овны Перемö. Ассис олансö пыр кежö йитiс Пермскöй педагогическöй институткöт: медперво уджалiс старшöй преподавательöн, сыбöрын - роч кыв сьöртi кафедра вылын доцентöн. Антонина Семёновна вöлi организаторöн коми-пермяцко-русскöй отделеннёлӧн.
Аслас научнӧй уджжезын пыдына исследуйтіс топониммез (местаэзлісь ниммез), антропониммез (морт ниммез да фамиллёэз), изобразительнӧй кыввез, уджаліс кывчукӧррез да велӧтчан небӧггез лэдзӧмын. А.С.Кривощёкова-Гантман автор сэтшöм уджжезлöн: «Коми-пермяцкий язык» (1961), «Коми-пермяцко-русский словарь» (соавтор Р.М.Баталова, 1985), «Географические названия Верхнего Прикамья» (1983) и с.о.
Кулiс А.С.Кривощёкова-Гантман Перемын май 31 лунö 1995 воö.
Содтӧт литература:
- https://ct4.ucoz.ru/publ/bibc4/8_g/g_063_0/9-1-0-281
- https://perm-book.ru/2015/krivoshhekova-gantman-a-s-otkuda-eti-nazvaniya-perm1973/
- https://комиокруг.рф/nasha-gordosty/krivoshtekova-gantman-antonina-semenovna-1921-1995.html
- 4. http://enc.permculture.ru/showObject.do?object=1803973785&viewMode=B_1803401803&link=1
[1] Антонина Семёновна Кривощёкова-Гантман (серия «Замечательные люди Пармы» Вып.6). Научно-популярное издание. - Кудымкар, 2021. - 96 с.
