Баталова Раиса Михайловна

КПИПКРО История языка 27 сентября 2021 Просмотров: 739

Баталова Раиса Михайловна [1] – тöдса коми-пермяцкöй учёнöй, специалист пермскöй кыввез сьöртi – филолог, велöтiсь, диалектолог, лексикограф, Российскöй академия наукись языкознаннё сьöртi институтiсь уджалiсь.

Раиса Михайловна шогмис август 10 лунö 1931 воö Юсьвинскöй районiсь Рудакова деревняын колхозниккез семьяын. Айыс, Боталов Михаил Григорьевич (1909-1968), 1935 воö уджалiс районнöй служащöйöн, а мамыс, Боталова (Постоногова) Мария Алексеевна (1909-1979), пенсияöдз уджалiс колхозын.

Антипинскöй школа помалöм бöрын Р.М.Баталова поступитiс Кудымкарскöй педагогическöй техникумö, кöдö помалiс 1951 воö. 1954 воö поступитiс историко-филологическöй факультет вылö Коми педагогическöй институтö (г. Сыктывкар).

1962 воö дорйис кандидатскöй диссертация «Оньковский диалект коми-пермяцкого языка в сравнительно-историческом плане» тема сьöртi.

Языкознаннё институтын уджалiкö, Р.Баталова вöлi младшöй научнöй сотрудникöн, а сыбöрын лоис медшöр научнöй сотрудникöн.

1998 воö Раиса Михайловна дорйис докторскöй диссертация «Диалектная система коми-пермяцкого языка в сравнительном и ареальном освещении» тема сьöртi.

Р.М.Баталова исследуйтіс быдкодь ладорсянь коми-пермяцкӧй кыв: коми-пермяцкӧй диалекттэз, фонетика, морфология, синтаксис, лексика и с.о. Сiя медодзӧн аркмöтiс коми-пермяцкöй диалекттэз сьöртi классификация, кӧдöн öнöдз мийӧ пользуйтчам. Раиса Михайловнаöн гижöм 100-ся унажык научнöй публикация.

Учёнöй наградитöм «В память 850-летия Москвы» медальöн, Г.К.Жуков медальöн (2005), «Ветеран труда» (2009) да мöдiк профессиональнöй да общественнöй наградаэзöн.

Раиса Михайловна Баталова кулiс Москваын январь 17 лунӧ 2016 воö.

Содтӧт литература:

[1] Раиса Михайловна Баталова (серия «Замечательные люди Пармы» Вып.7). Научно-популярное издание. - Кудымкар, 2021. - 96 с.