Цитатаэз гижикӧ туйӧ торйӧтны кавычкаэз отсӧтӧн и нытӧг.

Кӧр цитатаӧн лоӧ сёрникузя нето кынымкö сёрникузя и сулалӧ автор кыввез дырни, сэк пассэз сувтöтсьöны кыдз веськыт сёрни дырни: Филологическöй наукаэз сьöртi кандидат В.Пахорукова гижö: «60-öй годдэзö коми-пермяцкöй литератураын пондiс зорамны лирическöй проза».

Если цитатаыс сетсьö торья сёрникузяӧн, но босьтöма сiя не быдсöн, кольöм кыввез туйö сувтöтсьö многоточие: Костя дыр видзöтiс небоö да горöтчис: «Нетшкöвтчö одзлань самолёт, кымöррез увтöт уйö…» Витя дзар керис ёртыс вылö да содтiс: «…И бусыс сы вылö оз вод. И волькыт сылöн туйыс».

Кӧр цитатанас лоӧ сёрникузялӧн тор, сэк сiя босьтсьö кавычкаэзö и гижсьö учöт шыпассянь: Кыдз шуис поэт С.Караваев, Василий Климов «гарьяс мусö, кыдз богатырь, да адззас важ народнöй кыввез».

Кӧр сёрникузяын цитатаӧн лоӧ стихотворнöй тор, сэк кавычкаэз оз сувтöтсьö.

Михаил Дмитриевич Вавилин  Родина йылiсь гижö сэтшöм кыввез:

                Каждöй мортлöн Родина аслас.

                Ыджыт Родина и чужанiн –

                Быд сьöлöмын, кыдз песня и сказка,

                Кöдö оз мырддьы сылiсь некин.

Союззэзтöм сложнöй сёрникузяын сувтӧтчӧ  тире простöй сёрникузяэз коласын:

кöр одзза сёрникузяыс мыччалö кад нето условие, кöда дырни мунö действиеыс мöд сёрникузяас: Одзжык чеччан — унажык печкан.

кöр мöд сёрникузяас сетсьö вывод, следствие медодзза сёрникузяын мунӧмлісь: Асывсянь кожгö-зэрö – петны оз туй öтöрö.

кöр мöд сёрникузя мыччалö паныта действие медодзза сёрникузяись действиелö, событиелö, явленнёлö. Гожум заптö – тöв дзимлялö. (Посл.)

кöр сёрникузяэз мыччалöны событиеэзлiсь перыта вежсьöм. Кылiс звонок – челядь сэк жö петiсö классiсь.

Тире дырни союзтöм сложнöй сёрникузяын пыр керсьö пауза.

Точка  запятöйӧн (;) колӧ сувтӧтны:

союззэзтöм сложнöй сёрникузяын, если простöй сёрникузяын  эмöсь ни запятöйез: Гожумыс волi зэра, кöдзыт; нянь быдмис умöлик, виль годöдз оз тырмы. (М. Л.)

Ме виль отиркöт пантасьлi, уна кылi шоныт кыв;

Бур юöррезöн козьнаси, и сьöлöмö радмис жыв. (Г. Бачева)

Но счастьеыс – руч, сiйö сьöкыт вöтны и кузь кока солдатыслö; счастьеыс – ваын ёкыш, сiйö он гумышт ведраöн, он кут куш киöн.(В. Климов)

союззэзтöм сложнöй сёрникузяын, кӧр простöй сёрникузяэз смысл сьöртi абу матынöсь: Вöр весьтö лэдзчисис тулысся мича ой; вылын-вылын, лöз рöма небоын, пу йыввез коласöт тыдалiсö кык-куим звезда.

сложносочинённӧй сёрникузяын, если простöй сёрникузяын  эмöсь ни запятöйез:

Мамыс петiс джодж шöрас, видзис киас нянь бекöр; а сэсся сія мылякӧ перыта-перыта крестасис. (В.Климов сьӧрті)

Лыддьöтiкö точка да запятöй одзын керсьö ыджыт пауза.

Подлежащӧй да сказуемӧй коласын колӧ сувтӧтны тире,

кöр кыкнан главнöй членыс сетöм именительнöй падежа эманиммезöн:  Россия – менам роднöй мам. (С. Караваев)  Быд йöзлöн аслас карма вож: Россия — кутш, а Парма — ош. (В. Климов)

кöр кыкнан главнöй членыс сетöм неопределённöй формаа кадакыввезӧн: Видчыны – тöчитчыны, нерсьыны – зудъясьны.

Овны да вывны —  сёйны, уджавны да сьывны.

Овны да вывны — быдмыны ловнат вывлань. (В.Климов)

кöр кыкнан главнöй членыс сетöмöсь количественнöй лыданиммезӧн: Вит да вит — дас.

кöр главнöй членнэз коласісь öтыс сетöм именительнöй падежа эманимӧн, а мöдыс – неопределённöй формаа кадакылӧн либо количественнöй лыданимӧн: Быдтыны да берегитны вöр – вот главнöй задача округын олісь отирлöн. Миян талуння могным – пӧрӧтны вӧрсӧ кык норма.

кöр сказуемöй одзын сулалöны кыввез этö либо вот, сэк тиреыс сувтöтсьö эна кыввез одзын: Кудымкар – этӧ менам дона чужанін.