Пунктуационнöй правило – этö инструкция, кöдаын мыччассьöны условиеэз, кыдз гижикӧ бӧрйыны препинаннё пас. Бöрйикö сэтшӧм условиеэзӧн вермасӧ лоны сёрникузялӧн да сы торрезлӧн грамматическöй, смысловöй да интонационнöй ассямаэз.

Сёрникузя помын сувтӧтчӧны нёль пас:  точка [.], горӧтан пас [!], юасян пас [?], многоточие […].

Точка сувтӧ сэтшӧм сёрникузя помын, кӧда юӧртӧ мыйкӧ йылiсь: Локтiс ар. Кайез лэбзьӧны лунлань. Пондiс зэрасьны кӧдзыта.

Юасян пас сувтӧтсьӧ сэтшӧм сёрникузя помын, кӧдӧн баитiсьыс мыйкӧ йылiсь юасьӧ:

Кӧр локтас машинаыс? Кыным во тэнат тырис ни?

Горӧтан пас сувтӧтчӧ сэк, кӧр юӧрсӧ баитiсьыс висьталӧ удивленнёӧн, возмущеннёӧн либо горӧтӧмӧн:

Ура, миян команда быдӧннысӧ вермис! Бӧра эта старикыс миянӧ пырӧ! Мун ни татiсь! Мый, тэныт сизимись, я мый я, ӧтiксӧ баитны?!

Многоточие колӧ пуктыны сэк, кӧр сёрниыс висьталӧм не помӧдз:

Пызантыр Ваялiс Гаврилиха сёяннэз: и пöжалöмсö, и пуöмсö, и ульсö, и кöссö...

Сложносочиненнöй сёрникузя – этӧ сэтшӧм сложнöй сёрникузя, кöдаын простöй сёрникузяэз йитсьöны сочинительнöй союззэзöн и озӧ зависитö öтамöдныссянь.

Сложносочиненнöй сёрникзузяёэзын простöйес öтамöд дынсянь янсöтчöны запятöйöн.

Степанко личöтiс чересседельник, чапкис вöв одзö телегаись турунсö, а ачыс мунiс старичоккес дынö.(И.Минин)

Пантась кытöн-нибудь, пантась, нето сьöлöмö шогсянь орас (Г.Бачева).

! Мукöдпырся, кöр и да да союззэза сложносочиненнöй сёрникузяын эм öтласа член, кöда относитчö кыкнан простöй сёрникузя дынö, запятöйыс оз сувтöтсьы.

Сідз, сёрникузяын «Рытöн деревняын öзйисö биэз да жагöника лöньсисö быдкодь шыэз.» и биэз ӧзйісӧ рытӧн,  и шыэз лӧньсисӧ рытӧн, сійӧн союз да одзын запятӧй оз пуктiссьы.

Однороднӧй членнэз сёрникузяын торйӧтсьӧны запятӧйӧн.

Запятӧй колӧ пуктыны:

кӧр однороднöй членнэз йитöмӧсь перечислительнöй интонацияöн:  Чочком,  лöз, веж,  гöрд  рöммез  колісö  челядьлö  серпассэз  керöм  понда. Оз пурсьы, оз видчы, а керкуö пырны оз лэдз.

кӧр однороднöй членнэз дырни эм противительнöй союз:  Кык вон ордчöн олöны, а оз вовлiсьö. Öтöрас вöлi тöла, но шоныт. Учöт кöдзылыс, да вына. Эн тэрмöт тэ сiйö, но и эн падмöт. (Г. Бачева)

кӧр однороднöй членнэз дырни эм повторяйтчана союз:  Кывлöн  эм  и  лов,  и  мывкыд, и шог, и гаж. (Л.Никитин) Кӧть гожумӧн, кӧть тӧлӧн –  быд кадӧ Олёш новйис дӧмасалӧм пимиэсӧ.

! Если союззэз йитöны однороднöй членнэз параэзöн, то запятöйыс сувтöтсьö параэс коласö: Ю дорын быдмöны льöмпуэз да баддез, ыжман да сэтöр.

кӧр однороднöй членнэз дырни эм двойнӧй союз: Мийӧ вӧрас ӧктiмӧ кыдз тшак, сiдз и ягӧд. Кайез гажӧтӧны не только вӧрсӧ да ыбсӧ, но и деревнянымӧс.

! Если кык однороднӧй член йитсьӧны ӧтка соединительнӧй и, да союззэзӧн, ӧтка разделительнӧй или, нето, либо союззэзӧн, то запятӧйыс оз сувтӧтсьы:  Вылына ветлö небоöт гажа да мича шондi. Эта местасянь позьӧ иньдӧтчыны шульгаланьӧ либо веськытланьӧ.

! Некöр оз янсöтчö запятöйезöн союззэза фразеологическöй обороттэз: И öтыс и мöдыс, и сiдз и этадз, и лун и ой, и сэтчин и татöн, и сiя и эта, не öтыс не мöдыс, не кулöм не ловья, не одзлань не бöрлань, не ойöн не лунöн, не уна не етша, не одз не бöр, не спасибо не прощай, не дор не конец.