Вводнöй кыввез, вводнöй кыв сочетаннёэз да вводнöй сёрникузяэз – этö кыввез да кыв группаэз, кӧдна оз лоӧ сёрникузя членнэзӧн, нiя пыртсьöны сёрникузяас сы понда, медбы мыччавны баитiсьлiсь висьталöм дума дынö отношеннё.
Гижикö вводнöй кыввез, вводнöй сочетаннёэз, вводнöй предложеннёэз торйöтчöны запятöйöн:
Ме, конечно, и одзжык адззывлi тарресö, но сэтшöм матын – первуись. (вводнӧй кыв сулалӧ сёрникузя шӧрын, запятӧйезӧн торйӧтам кыкнан ладорсянь).
Öтiк кылöн шуны, позьö татöн овны. (вводнӧй сёрникузя сулалӧ сёрникузя пондöтчикö, запятӧй пуктам сы бӧрын).
Эта, отирыс баитöм сьöртi, вöлi не сiдз. (вводнӧй сочетаннё сулалӧ сёрникузя шӧрын, запятӧйез сулалӧны и одзас, и бӧрас).
Вводнöй сёрникузя, кöда сулалö сёрникузя шöрын и кöда вылö обращайтчö особöй вниманнё, вермас торйöтчыны тиреöн: Вöрас – кыдз ми адззам – абужык зэрöма.
Вводнöй сёрникузяэз, кӧдна мыччалӧны основнöй дума дынö содтӧт, торйöтчöны скобкаэзöн, а если вежӧртас сьöртi нiя матынöсь висьталöмыс дынö – тиреöн.
Назёмыс (сiйö кыскалiс велöтчиссезлöн бригада) куйлiс пришкольнöй участок вылас ровнöй грудаэзöн.
Только öтпырись – и эта вöлi важын ни – Коля да Митя лöгасьлiсö.
