Союзтöм сложнöй сёрникузяын простöй сёрникузяэз коласын сувтöтам двоеточие:
кöр мöд сёрникузяыс мыччалö одзись сёрникузялісь действие мунöмлiсь причина. Сергей сэсся эз шыась: абу охота горшсö весись летны. (И. Минин) Арсö оз радейт некин: медбур кад пö гожся. (В. Климов)
кöр мöд сёрникузяыс содтö, вежöртöтö медодззаыслiсь пытшкӧссӧ (содержаннёсö). Баитö эд йöзыс: беда некöр öтнас оз вовлы. Кытшöм счастливöй ме оськала, висьтавны этö абу кыв: ме парма-вöрлöн, визыв Велва валöн счастливöй му сьылöтiсь ныв. (Г. Бачева)
кöр одзлань мунöны кынымкö простöй сёрникузя, кöдна паськӧтӧны вежӧртас медодзза сёрникузялісь. Арыс асмоза асьсö миянлö мыччалö: гöрд рябина öгралö, веж дубасö кыдз мöдöтчö, кайез лунлань лэбзикö гажтöм сьыланкыв сьылöны.
Лыддьöтiкö двоеточие дырни сёрникузяэз коласын керсьö ыджыт пауза.