Веськыт сёрниа сёрникузяын эмöсь авторлöн кыввез (А) и веськыт сёрни (В).
Автор кыввез да веськыт сёрни коласын сувтöтсьö двоеточие, кöр веськыт сёрниыс сулалö авторыс кыввез бöрын: Шутка туйö примитiс Степан Фёдорович зоныслiсь баснисö и ответитiс: «Ачыт тöдан. Ме тожö томöн пондi уджавны» (Т. Фадеев).
Автор кыввез да веськыт сёрни коласын сувтöтсьö тире, кöр веськыт сёрниыс сулалö авторыс кыввез одзын: «Миша, ветлы библиотекаö,» – тшöктiс Оля.
Кöр авторлöн кыввес сулалöны веськыт сёрни шöрын, то ны коласын пуктам тире: «Менам, бабу, оз ни онö пет, – сё эшö гор пытшкыс би вылас видзöтiкö гажöн висьталiс Серёжа. – Миссьыны колö котрасьны.» (В.Баталов)
Веськыт сёрни босьтсьö кавычкаэзö. Быд сёрникузяыс сыын гижсьö ыджыт шыпассянь. Веськыт сёрниа быд сёрникузя бöрын сувтöтсьö сiя пасыс, кöда колö шуан мог сьӧрті да вын висьталӧм сьöртi (точка, горӧтан пас нето юасян пас).
Кöр веськыт сёрниыс повествовательнöй сёрникузя, а авторлöн кыввес сулалöны сы бöрын, то веськыт сёрниыс бöрö сувтöтсьö запятöй да тире: «Шарик, мунам мекöт», – малыштіс понсö Егорша.
Кöр авторлöн кыввес сулалöны веськыт сёрни шöрын, то пассэз сувтöтсьöны сiдз:
Авторлöн кö кыввес янсöтöны простöй нето сложнöй сёрникузя, то веськыт сёрнилöн мöд торыс пондöтсьö гижсьыны учöт шыпассянь
«Таво, - горöтчис директор, – челядь öддьöн уна отсалiсö лесничестволö». «Кымöртчис гöгöр, – керкуö пырикö шуис мамыс, – колö чожажык дзимлявны турунсö».
Авторлöн кö кыввес сулалöны кык самостоятельнöй сёрникузя коласын, то авторыс кыввез бöрын сувтöтсьö точка да тире. А веськыт сёрнилöн мöд торыс пондöтсьö гижсьыны ыджыт шыпассянь.
Веськыт сёрнилöн медодзза тор бöрын сувтöтсьö: а) юасян нето горӧтан пас и тире, если сёрникузяыс юасян или горӧтан; запятöй и тире, если сёрникузяыс повествовательнöй.
«Тэ лыддьöтiн этö книгасö? - юалiс Сережалiсь библиотекарь. - Сiя öддьöн интереснöй».
«Мымда татöн тшакыс! - горöтiс Ваня. - Петя, лок татчö».
«Öнi ог ни öш, - думайтiс Егор. - Туйыс кытчöкö вайöтас».
