Лексикография – языкознаннёлöн тор, кöда велöтö, кыдз чукöртны да гижны кывчукöррез. Лексикография кыв аркмö кык греческöй кылiсь lexikós «кывкöт йитсьöм» да gráphō «гижа».
Кывчукöрöн шусьö небöг, кытöн сьöрсьöн-бöрсьöн вайöтöмöсь кыввез либо морфемаэз, торья кыввез либо кыв тэчассэз (словосочетаннёэз), кöдналö либо сетсьö вежöртасыс, либо нiя вуджöтсьöны кытшöмкö мöдiк кыв вылö. Кывчукöрлöн шöр мог пуктöм сьöртi позьö торйöтны толковöй, кыв аркмöтана, вуджöтöм, этимологическöй, энциклопедическöй да мöдiк кывчукöррез.
Коми-пермяцкöй кыв сьöртi лöсьöтöмöсь вуджöтана кывчукöррез: П.С. Кузнецов, А.М. Спорова «Русско-коми-пермяцкий словарь», Кудымкар, 1946; Р.М. Боталова, А.С. Кривощёкова-Гантман «Коми-пермяцко-русскöй словарь», М, 1985; специальнöй кывчукöррез: Коми-пермяцкöй орфографическöй словарь. Кудымкар, 1992; Коми-пермяцкöй терминнэз. Кудымкар, 1940.
Коми-пермяцкӧй лексемаэз медодз вӧлісӧ фиксируйтӧмӧсь XVIII векӧ. Учёнӧйез-путешественниккез Г.Ф. Миллер, И.Э. Фишер, П.С. Паллас, И.И. Лепёхин, кӧдна бытшӧма исследуйтiсӧ Сибирись да Волга ю дорись отирресӧ олан да кыв ладорсянь, пыртӧмась вӧлi асланыс уджжезӧ и торья коми-пермяцкӧй кыввез.
Паськытжыка коми-пермяцкӧй лексика вӧлі мыччалӧм XIX векся сэтшӧм памятниккезын: «Лексикон пермского языка… Георгия Чечулина», «Словарь русско-пермяцкій» (1848) да мӧдіккезын, а сідзжӧ печатайтӧм небӧгын: Н.А. Роговлӧн «Пермяцко-русский и русско-пермяцкий словарь» (1869). Висьталӧм уджжезын ӧтлаын торья кыввезкӧт сетӧмӧсь свободнӧй кывсочетаннёэз, составнӧй терминнэз да фразеологизммез.
27 сюрсся унажык кыв да кывтэчас вӧлісӧ пыртӧмӧсь «Коми-пермяцко-русскӧй словарьӧ» (1985), кӧдӧ лӧсьӧтісӧ Р.М. Баталова да А.С. Кривощёкова-Гантман.
1993 воӧ Коми-Пермяцкӧй округись национальнӧй школаэз понда вӧлі лэдзӧм «Коми-пермяцко русскӧй и русско-коми-пермяцкӧй словарь», кӧдӧ составитісӧ Г.И. Немтинова, В.В. Федосеева да Л.Ф. Яркова.
2010 воӧ О.А. Попова лӧсьӧтіс «Коми-пермяцкӧй фразеологическӧй кывчукӧр», кытчӧ пырисӧ кыдз литературнӧй, общеупотребительнӧй, сідз и диалектнӧй фразеологизммез.
Бӧрья воэзӧ петісӧ школаэз понда синонимическӧй, антонимическӧй да морфемнӧй кывчукӧррез.
