Литературнöй кыв – национальнöй кывлöн медвылын форма, кöдалӧн эмӧсь аслас нормаэз.
Литературнöй кывлöн нормаэзöн лоöны:
- Орфоэпическöй нормаэз тшöктöны правильнöя шуны быд кывсö, баитны колана интонацияöн.
- Орфографическöй да пунктуационнöй нормаэз тшöктöны правилэз сьöртi гижны кыввез да сувтöтны препинаннё пассэз.
- Стилистическöй норма, кöда йитö быдöс правилоэсö, кöдна отсалöны баитны либо гижны быдкодь условиеэзын: тшöктö пыртны сёрниö сэтшöм кыввез, кыв сочетаннёэз да сёрникузяэз, кöдна колöны сетöм стильын.
Сёрни культура — этö правильнöй, литературнöй сёрнилiсь нормаэз соблюдайтöм, кывлöн образность, выразительность.
А.Н.Зубов да М.П.Лихачев 20-öй годдэзö гижисö коми-пермяцкöй литературнöй кыв вылын медодзза небӧггез. Энö морттэсö öнi лыддьöны коми-пермяцкӧй литературалöн да литературнöй кывлöн основоположниккезöн.
Коми-пермяцкöй кывлiсь аскоддясö пондiсö велöтны 30-öй годдэзö. Сывтывкарын «Коми кывлiсь диалекттэз велöтöм да словаррез чукöртöм понда комиссиялöн сборникын» 1930 годö вöлi печатайтöм Г.А.Нечаевалöн «Коми кылiсь зюздинскöй диалектлöн характеристика» статья, 1931 годö – «Окружнöй коми литературнöй кывлöн Коми округись севернöй диалекттэз дынö отношеннё» статья.
Война годдэзö миян округö вöлi эвакуируйтöм роч профессор П.С.Кузнецов, кöда öтлаын А.М.Споровакöт лэдзис «Коми-пермяцко-русскöй словарь». Эта жö кадö П.С.Кузнецовлöн петö «Коми-пермяцкöй кылiсь иньвенскöй диалектын чорыт Л-лöн судьба» статья.
50-öй годдэзö мыччисисö асланым ученöйез – кыв велöтiссез. 1951 годö А.С.Кривощекова-Гантман дорйис «Коми-пермяцкöй кылiсь иньвенскöй диалектлöн словарнöй состав да кыввезлöн вежласьöм» тема вылö кандидатскöй диссертация. Сiя жö гижис научнöй статьяэз морфология да лексика сьöртi, велöтiс топонимика, уджалiс школьнöй учебниккез вылын.
Коми-пермяцкöй кыв велöтöмö ыджыт пай пуктiс тöдчана финно-угровед, профессор В.И.Лыткин. 1952 годö сiя печатайтiс «Коми-пермяцкöй кылын удареннё йылiсь» статья, 1953 годö – «Коми-пермяцкöй диалекттэз велöтöм понда Пермскöй областьö научнöй командировка сьöртi отчет». 1961 годö сылöн петiс «Коми-язьвинскöй диалект» книга. 1962 годö В.И.Лыткин редакция увтын петiс «Коми-пермяцкöй кыв» вуз понда учебник, кöдö гижис авторезлöн коллектив, кытчö, В.И.Лыткинся, пырисö Р.М.Баталова, Е.В.Ботева, А.С.Кривощёкова-Гантман, Е.С.Гуляев, Б.А.Серебренников.
1962 годö коми-пермяцкöй кыв сьöртi вöлi дорйöмась кык кандидатскöй диссертация:
- Е.В.Ботевалöн «Коми-пермяцкöй школаын кудымкарско-иньвенскöй диалект условиеззын 4-6 классэзын морфология велöтан методика».
- Р.М.Баталовалöн «Коми-пермяцкöй кывлöн оньковскöй диалект».
60-70-öй годдэзö Р.М.Баталова велöтö коми-пермяцкöй кывлiсь диалекттзз, 1975 годö сылöн петö «Коми-пермяцкöй диалектология» монография. Сыын сетöмöсь куим наречие: севернöй, южнöй и верхнекамскöй (Кировскöй областись пермяккезлöн).
1976 годö З.К.Тудвасева дорйис «Коми-пермяцкöй кылын послелоггез да школаын нiйö велöтан методика» тема вылö кандидатскöй диссертация, кытöн ордчöн велöтан вопроссззкöт петкöтöмöсь и сложнöй кыввез, кыв сочетаннёэз да послелоггез гижан правилоэз.
1982 годö петiс Р.М.Баталовалöн «Восточнöй финно-угорскöй кыввез сьöртi исследованнёэз» книга, кытöн гижсьö коми-пермяцкöй да коми-зырянскöй кыввезын фонетикаын да морфологияын ассяма йылiсь.
1985 годö петiс ыджыт удж, кöдö керисö Р.М.Баталова да А.С.Кривощöкова-Гантман – «Коми-пермяцко-русскöй словарь».
20 век помын да 21 век пондӧтчикӧ вӧлісӧ исследуйтӧмӧсь коми-пермяцкӧй диалекттэз А.С.Лобанова, Р.П.Попова, Е.Н.Федосеева, Т.Н.Меркушева, Л.Г.Пономарёва диссертационнӧй уджжезын. Топониммез одзлань ӧктіс О.П.Аксёнова, фразеологизммез сьӧрті уджаліс О.А.Попова, терминнэз видзӧтіс Л.В.Утева.