Коми-пермяцкӧй кывлӧн синониммезӧн кывчукӧр лэдзӧм медодззаись Кудымкарын 2017 воӧ. Чукӧртісӧ сійӧ Нина Егоровна Бражкина да Татьяна Николаевна Меркушева. Кывчукӧр лӧсьӧтӧм 1-9 классэзын велӧтчиссез понда. Сэтчӧ ӧктӧмӧсь и пыртӧмӧсь синониммез, кӧдна пантасьлӧны быдкодь велӧтчан небӧггезын.
Синониммез чукӧртӧмӧсь синонимическӧй виззезӧ. Медодззанас пуктӧм сэтшӧм кыв, кӧда паськыта и унажык пантасьлӧ быд сёрнитан стильын, сылӧн вежӧртасыс паськытжык мӧдік кыввезся: бур – бытшӧм – кодя – долыт – мича.
Быд кыв дынӧ вайӧтӧм коми-пермяцкӧй художественнӧй литератураись пример:
АСКОДДЯ – АССЯМА
Эстӧн айӧ и шулялӧ-гӧрӧ му, кӧда лолалӧ аскоддя уль руӧн. (С.Ф.) Мый бы эн шу, а Гублян – ассяма, асруа, асвужья посад, кӧть и, видзӧтан да, вачкисьӧ мыйӧнкӧ Ошыб вылӧ, Сер вылӧ, Йӧг вылӧ. (В.К.)
Примеррез пантасьлӧны быдкодь грамматическӧй формаэзын. Шуам, шедны кыв дынӧ вайӧтӧм сэтшӧм пример: Учӧтик ӧшынокӧт избушка пытшкас югытыс шедіс етша. (Т.Ф.)
Синонимическӧй визьӧ пырӧны ӧтік сёрннторись кыввез.
Аслас вежӧртас сьӧрті ӧтік и сія жӧ кыв вермас пантасьлыны неӧтік синонимическӧй визьын.
Кывчукӧр лӧсьӧтікӧ материал вӧлі ӧктӧм 1985 вося Р. Баталова да А. Кривощёкова-Гантманлӧн «Коми-пермяцко-русскӧй словарь» да 1993 вося «Коми-пермяцко-русскӧй, русско-коми-пермяцкӧй словарь» сьӧрті.
