Приложеннё – этö сэтшöм определеннё, кöда вежöртöтö определяемöй кывсö мöдік нимöн – собственнöйöн или нарицательнöйöн: Тимшор деревняын мийö сувтчывлімö Матрёна баб ордö. (В. Баталов). Ме парма-вöрлöн, визыв Велва валöн счастливöй му сьылöтiсь ныв.(Г.Бачева)
Приложеннё унажык сетсьö эманимӧн:
Нарицательнöй эманимöн, кöда мыччалö предметыслісь быдкодь ассяма качествоэз да свойствоэз: Узьö тöв-старушка, дзор синлыс пужмалöм(Г.Бачева), Асывсянь часто буситлiс поснитик зэрок, лун кежас дугдывлiс, рытнас мыччасис вежöтöм шондi, а ойнас гöняйтiс сивко-пуж (В.Климов). Рытся пемытас учкись-пурга гусь гораньöн столаэскöт орсö. (В. Климов).
Собственнöй нимöн, кöда сулалö нарицательнöй существительнöйöн сетöм определяемöй кыв одзын: Кöдö кöркö Кама юсис вöтлöм Пера-богатырь (В.Климов) Öтпырись падера лунö ме ветлöті Кува ю дорöт. (В.Баталов)
Если приложеннёыс и определяемöй кылыс лоöны нарицательнöй существительнöйезöн, сэк ны коласö сувтöтсьö кырöлок: Адзза тэнчит ме посад паськыт парма-вöрись. (М. Вавилин)
! Кыролок оз сувтöтсьы, кöр приложеннё сетсьö собственнöй существительнöйöн: Керöс вылö поздісьöма Кудымкар городок. (М. Вавилин) Важын ни кöркö Сизимшор деревняын чужис зонкаок. (В.Баталов)
Приложеннё колӧ босьтны кавычкаэзö и гижны ыджыт шыпассянь, кöда лоö художественнöй произведеннёэзлöн, газетаэзлöн, журналлэзлöн, небöггезлöн, а сідзжö колхоззэзлöн, совхоззэзлöн, предприятиеэзлöн, кооперативвезлöн ниммезöн. 2021 воӧ петіс Василий Козловлӧн челядь понда «Шондіа видз » небӧг. 2. «Югӧр» чукӧр быд во чулӧтӧ «Кыв менам дона» акция.
! Кавычкаэз оз сувтöтсьö приложеннёэз дырни, кöдна бӧрын сулалö кыв нима: М. Горький нима театрын мунö «Гузи да Мези» спектакль.