Фонетика – этӧ кыв наукалӧн тор, кӧда велӧтӧ шыэз, нылiсь аркмӧм, закономернӧй явленнёэз, интонация, удареннё да слоггез вылӧ торйӧтӧм.
Шыэз мийӧ шуам да кылам, а шыпас – адззам да гижам.
Исконнӧй коми-пермяцкӧй кылын торйӧтӧны 33 шы: а, б, в, г, д, дʼ, дж, дзʼ, тш, ж, з, зʼ, и, йʼ, к, л, лʼ, м, н, нʼ, о, ӧ, п, р, с, сʼ, т, тʼ, у, чʼ, ш, ы, э. Этася кыввезын, кöдна пырисö, пырöны роч кылісь, пантасьлöны эшö шыэз: х, ф, ц, щ.
Быд шы аркмӧ сёрнитан органнэз отсӧтӧн.
Асланыс аркмӧм сьӧрті шыэз торйӧтсьӧны гласнӧйез да согласнӧйез вылӧ, нылӧн эм уна ассямаыс.
Коми-пермяцкӧй сёрнишыэз пыдына видзӧтісӧ асланыс уджжезын Алевтина Степановна Лобанова, филологическӧй наукаэз сьӧрті кандидат, да Утева Любовь Валерьевна, филологическӧй наукаэз сьӧрті кандидат.
