Коми-пермяцкöй орфографиялöн кык основнöй принцип: фонетическöй да морфологическöй.
Фонетическöй принцип сьöртi кыввез гижсьöны сiдз, кыдз нiя шусьöны, например: керку, кыйны. лыддьыны, талуння. ашыння, пессьыны, киссьыны.
Морфологическöй принцип сьöртi кыввез гижöмын колӧ видзны тӧдвылын нылісь морфемаэз. Быд случайын нiя сетсьöны öтмоза, нылöн гижöмыслö шумыс оз мешайт: вöтны – вöтчыны [вöч'ч'ыны]; сотны – сотчыны [соч'-ч'ыны]. Эна кыввезын ч аскодялö т, но гижсьöны нiя морфологическöй принцип сьöртi.
! Унажык рочись пырӧм кыввез гижсьöны оригиналыс принцип сьöртi: журнал, класс, философия, сахар, щётка, телефон.
Коми-пермяцкöй орфографиялöн эмöсь эшö различительно-условнöй да историческöй принциппез, но нiя пантасьлöны шоча.
Различительно-условнӧй принцип сьӧрті гижам сложнöй кыв да кывтэчас: порськок (быдмас) и порсь кок (порсьлöн кок), урбöж (быдмас) и ур бöж (урлöн бöж), кушборд (животнöй) и куш борд (бордыс кушмöм), катшасин (ромашка) и катша син (катшалöн син).
Эта принцип подув вылын гижсьöны ыджыт буквасянь собственнöй ниммез: Кудымкар, журнал «Сильканок», сьыланкыв «Кыдзок».
Историческöй принцип казяссьӧ кыввезын, кӧр падежжез вежлалӧм коста, петӧны кöркöся шыэз: кос – коскын; лок – локта.
