Парнӧй кыввез – этӧ кыввез, кӧдна сулалӧны кык кылісь: ая-зона, пырны-петны, одз-бӧр. Парнӧй кыввез гижсьӧны кыролок пыр.
Парнӧй кыввезӧн вермӧны лоны эманиммез: мама-ныла, нимтаннэз: идъя-зӧрья, кадакыввез: сюльтыртны-баитны, урчитаннэз: улӧ-вылӧ.
Парнӧй кыввез – этӧ кыввез, кӧдна сулалӧны кык кылісь: ая-зона, пырны-петны, одз-бӧр. Парнӧй кыввез гижсьӧны кыролок пыр.
Парнӧй кыввезӧн вермӧны лоны эманиммез: мама-ныла, нимтаннэз: идъя-зӧрья, кадакыввез: сюльтыртны-баитны, урчитаннэз: улӧ-вылӧ.
Лексика – этӧ быдӧс торья кыввез, кӧдна эмӧсь миян кылын.
Кыв наукалӧн тор, кӧда велӧтӧ торья кыввез, шусьӧ лексикологияӧн. Лексикология велӧтӧ, мый сэтшӧм кыв да сылӧн вежӧртас, кӧр чужис да аркмис кылыс, кыдз кыввез пантасьлӧны текстын, сёрникузяын да кывтэчасын.
Парнӧй кадакыввез – этӧ кадакыввез, кӧдна аркмӧны кык кадакылісь: дзульзьыны-сьывны, пырны-петны, кожгыны-зэрны.
! Парнӧй кадакыввез гижам кыролок пыр.
Видзӧтӧ, кыдз вежласьӧны парнӧй кадакыввез лицо, лыд сьӧрті ӧння кадын:
Кыв (торья кыв) – этӧ сёрнилӧн да кывлӧн медшӧр тор, кӧдалаӧн эм вежӧртас, сетӧ ним предметтэзлӧ, действиелӧ, признаккезлӧ и с.о. Кыввез отсӧтӧн аркмӧны кывтэчассэз да сёрникузяэз, тексттэз да юӧррез. Ачыс кылыс аркмӧ шыэзісь да морфемаэзісь.
Быд кывлӧн эм аслас вежӧртас: туримоль – гӧрд рӧма, шӧма ягӧд, кӧда быдмӧ нюрын; дзель – балялӧн пиян, велӧтны – сетны кинлӧкӧ виль тӧдӧммез, чочком – лым рӧма, важ – кӧдӧ дыр видзим, новйим, важ паськӧм.
Кывлӧн вежӧртас вермас лоны веськыт и невеськыт. Сідз, Шонді сералӧ сёрникузяын, шонді кыв веськыт вежӧртасын, а сералӧ кыв – невеськытын.
Кыввезлӧн вермас лоны ӧтік вежӧртас, а вермасӧ лоны уна вежӧртассэс. Горадзуль кыв – ӧтік вежӧртаса кыв. А пинь кыв лоӧ уна вежӧртаса кылӧн, сідз кыдз мыччалӧ и мортлісь пинь, и пинялісь пинь, и сынанлісь пинь.
Унажык кыввез пантасьлӧ паськыта и быдыслӧн сёрниын, например, ва, туй, ай, веж и с.о.
А эмӧсь кыввез, кӧднӧ туйӧ кывны мукӧд районын, например, нарман – Юсьвинскӧй районын, чӧд – ойвывся районнэзын.
Кыввез вермасӧ лоны матынӧсь вежӧртас сьӧрті, но торьявны гижӧмӧн – синониммез: шуны – висьтавны, шоныт – рушыт. И наоборот, ӧткодя гижссьыны, то вежӧртас лоас аслас быд кылыслӧн (омониммез): кыв – мортлӧн ӧмын и кыв – сёрнилӧн тор.
Кыввез миян сёрниын чужисӧ кӧркӧ важын и олӧны ӧнӧдз: ки, мунны, лӧз, тэ, дыр, кык.
Унакодь кыввез миян сёрниӧ пырӧны мӧдік отир кыввезісь: баб, дед, зелёнӧй, огурец – роч кылісь, джем, принтер – английскӧй кылісь роч кыв пырйӧт, дзюдо, суши – японскӧй кылісь, планшет, бизе – французскӧй кылісь и с.о.
Кыввез вермӧны ӧшны отир сёрниись, но вермӧны и аркмыны вильӧсь. Ӧння кадӧ етша пантасьлӧ кыв нӧш, кӧдӧн одзжык гладитісӧ паськӧм. Эта кыв туйӧ ӧтлаын предметнас коми-пермяцкӧй кылӧ локтіс кыв утюг.
Кывлӧн вежӧртас – этӧ сійӧ, мый мыччалӧ ӧтік торья кыв.
Сідз, эм пельняньдар, кыдз предмет и кыдз кыв. Пельняндар кывлӧн вежӧртасӧн лоӧ «пым ваись пельяннез кыскалӧм понда осьтаэза ыджыт пань».
Кывлӧн вежӧртас вермас лоны ӧтік и уна, веськыт и невеськыт.
Ӧтік вежӧртаса кыввезӧн лоӧны: горадзуль, зон, лым.
Уна вежӧртаса кыввезӧн туйӧ лыддьыны сэтшӧммез: юр, мунны, петны.
Юр кывлӧн веськыт вежӧртасӧн лоӧ «мортлӧн или подалӧн вывтырын тор». Юр кывлӧн невеськыт вежӧртасӧн лоӧ «йыв, вевдӧр»: керку юр.