Мыччалан тип – сёрни тип, кöдаын предмет (морт, вöрва, пода и с.о.) мыччассьöны уна ладорсянь. Мыччалан типа текст пыр сетö ответ кытшöм?, кытшöмöсь? юасьöммез вылö. Сiдз юасьны позьö предмет, морт, вöрва, оланiн йылiсь. Быдлöн эм аскодяыс кыдз вевдöрсянь, сiдз и пытшксянь. Юрси, чужöм, паськöм и с.о. отсалöны мыччавны мортсö вевдöрсянь, а мывкыд отсалö – пытшксяняс.
Мыччалана текстын кокнита янсöтсьöны прилагательнöйез, существительнöйез, кöднаын казяссьö дон (оценка). Сэтшöм текстын пантасьлöны именнöй сказуемöйез, назывнöй сёрникузяэз.
Мыччалан текст лöсьöтсьö унажыксö то кытшöм схема сьöртi:
Сэтшöм йитсьöмыс шусьö параллельнöйöн. Медодзза сёрникузяын петкöтсьö тема. А одзланься сёрникузяэзын мыччассьö предметлöн, явленнёлöн аскоддяыс.
Например, босьтам текстiсь тор.
Кин видзöтiс бы Миковлö синнэзас, висьталiс бы: мывкыда эта мортыс, уна вермас керны сылöн высиныс. Кыв кö горöтчас Рыжык, кыдз черöн тякнитас, чорыта да лэчыта висьталас. Бикыв кодь сук юрси гöрд зуöн сулалö, пель дыннэзас читкыльтчöм да каттисьöма пель саяс. Юрсиыс сьöртi пондöмась шуны сiйö «Рыжыкöн». (М.Л.)
Бöрйöм текст – мыччалан типа. Автор геройлiсь аскодясö мыччалö синнэзлöн дзар пырйöт, сёрни отсöтöн, юрси рöм сайсянь сылö сетöм Рыжик ним. Быд мыччалана текстын кокнита петкöтсьö медшöр дума- идея: сетöм текстын Рыжик мыччассьö мывкыда вына мортöн, кöда тöдчö сы дзарын, сёрниын, зусиа юрсиын. Сiйöн мыччалан текст отсалö лыддьöтiсьлö казявны да йитны öтлаö Рыжыклiсь аскодьсö кыдз вевдöрсянь, вывтырсянь, сiдз и кытшöм сылöн мывкыдыс, пытшкыс.
