Сёрни стиль – кывлöн разновидность , кöда пантасьö неöткодь баитан условиезын, кӧдалӧн ассямаыс тыдалӧ кыввез бӧрйомын, грамматикаын да интонацияын.
Кыв йылiсь наукаын примитöма торйöтны вит сёрни стиль: сёрнитан (разговорнöй), научнöй, официально-деловöй, публицистическöй да художественнöй.
Коми-пермяцкöй кылын паськытжыка пантасьлöны сёрнитан (разговорнöй), художественнöй, научнöй да публицистическöй стиллез.
Быд стильлöн эм аслас мог, признаккез, кывлöн средствоэз, жанррез, употребляйтчан условиеэз.
Коми-пермяцкöй кылын медбура зорамӧмась сёрнитан да художественнöй стиллез. Медбöрья кадö зорамöны научнöй стиль (сы вылын лэдзöны велöтчан небöггез, научнöй литература) да публицистическöй стиль (пантасьö газетаэзын, журналлэзын, радиоын да телевиденнёын).