Текст – этӧ кык либо унажык сёрникузя, кӧдна йитӧмась ӧтамӧд коласын темаӧн, медтӧдчана думаӧн, грамматикалӧн правилоэз сьӧрті.
Быд текстын туйӧ торйӧтны тема да шӧр дума.
Текстлӧн тема – этӧ сія, мый йылісь мунӧ сёрни. Тема йитӧ сёрникузяэз смысл сьӧрті. Сы сьӧрті вермас сетсьыны текстлӧ юрним.
Текстлӧн шӧр дума – этӧ сія, мый йылісь мӧдіс висьтавны гижись, мый дорӧ сія велӧтӧ да мый тшӧктӧ вежӧртны.
Текстлӧн эм юрним, кӧда мыччалӧ тема либо дума вылӧ.
Текст позьӧ янсӧтны смысловӧй торрез (микротемаэз) вылӧ. Быд торлӧн эм аслас тема, пытшкӧс (содержаннё), мӧдік подтемаэз. Сы дынӧ туйӧ сувтӧтны юасьӧм, сетны сылӧ юрним.
Смысловӧй торрезлӧн юрниммез (заголовоккез) сьӧрті аркмӧтӧны простӧй либо сложнӧй план.
Кынымкӧ сёрникузя, кӧдна йитӧмась ӧтік шӧр думаӧн, сетсьӧны торья абзацӧн.
Сёрникузяэз текстын сувтӧтӧмась сьӧрсьӧн-бӧрсьӧн. Сёрникузяэз вермасӧ йитсьыны текстын вежӧртас (смысл) сьӧрті да грамматика ладорсянь.
Лексика ладорсянь сёрникузяэз вермасӧ йитсьыны:
- повторяйтчана кыввез отсӧтӧн: Вӧррез – миян богатство. Вӧррез миянӧс вердӧны, юкталӧны, сетӧны лов.
- ӧтік тематическӧй группаись кыввез отсӧтӧн: Локтіс кузь да кӧдзыт тӧв. Мороззэз бура кынтісӧ юэз да шоррез. Лым тыртіс керкуэз, йӧррез.
- синониммез (да текстовӧй синониммез отсӧтӧн): М.П. Лихачёв уна керис письменность зорӧтӧм понда. Коми-пермяцкӧй гижись вежӧртіс, что колӧ петкӧтны учебниккез да быдкодь мӧдік литература.
- антониммез отсӧтӧн: Чожыс лунӧн уна ештас керны. Жагыс – унажыксӧ думайтас.
- сравненнё (описательнӧй оборот) отсӧтӧн: Пипуоккез оз лэдзӧ тыртны туёксӧ лымӧн. Кыдз часовӧйез, нія сулалӧны ордчӧн, веськытӧсь, басӧкӧсь.
- нимвежан отсӧтӧн: Сэтшӧм погоддяӧ вӧрын он пантав не вӧрпиӧс, не пӧткаӧс. Нія быдӧнныс кытчӧкӧ дзебсисьӧны.
- урчитан отсӧтӧн: Самолётыс вайӧтӧм хищниксӧ Кудымкарӧдз. Сэтчин орёлісь керӧмась чучело.
- союззэз отсӧтӧн: Саймис деревняын пон да кынымиськӧ вувтыштіс. А ю саяс паныт вувтісӧ тысяча мымда поннэз.
- частицаэз отсӧтӧн: Ме сэсся некӧр ог пыр Иван ордӧ. Эд сiя меным сымда умӧльсӧ керис.
- ӧтік кадын сулалана глаголлэз-сказуемӧйез отсӧтӧн: Муні ме кыдзкӧ тӧвнас турунла. Локті видз вылӧ зород дынӧ, понді лымсӧ тальны.
