Грибанов Спиридон Федотович чужис 1911 воӧ Кудымкарскӧй районісь Пронёва деревняын. 1930 воӧ помаліс Кудымкарскӧй педагогическӧй училище, кӧда бӧрын уджаліс Вагановскӧй начальнӧй школаын. 1932 восянь уджаліс Коми-Пермяцкӧй книжнӧй издательствоын, кысянь вӧлі иньдӧтӧм Москваӧ учебно-педагогическӧй издательстволӧн коми секцияӧ. Сы бӧрын сія бертіс Кудымкарӧ. Велӧтчан небӧггез аркмӧтӧм удж бердӧ кутчисис 1930 воэзӧ и уджаліс 1941 воӧдз, фронт вылӧ мунӧмӧдз.
Сія лӧсьӧтіс печать дынӧ «Букварь», кӧда муніс сизим переизданнё, «Коми кыв грамматика» (нёль изданнё), коми-пермяцкӧй орфографическӧй словарь (кык изданнё). Коми-пермяцкӧй грамматикалӧн учебниккез, кӧднӧ аркмӧтіс С.Ф.Грибанов, лоӧны тӧдчанаэзӧн и ӧння кадӧ. Ны сьӧрті туйӧ видзӧтны, кыдз зорамис коми-пермяцкӧй кылыс, сылісь графика, орфография, лексика да морфология.
С.Ф.Грибанов вуджӧтіс коми-пермяцкӧй кыв вылӧ А.Шмидтлісь, М.Горькийлісь, А.Пушкинлісь произведеннёэз, «Школьные и массовые песни» (1933) сборникын чукӧртӧм сьыланкыввезлісь тексттэз.
1941 вося арӧ С.Ф.Грибанов муніс фронт вылӧ. Оланыс орис 1942 воӧ.
