Сёрнитан стиль – сёрни стиль, кӧда пантасьлӧ гортын, ёрттэзкöт да бур тöдсаэзкöт баитiкö, общественнöй местаэзын. Сы вылын аркмöны матын отиркöт сёрнитöм (диалог), матын отир понда письмо, записка да смс-сообщеннё.
Сёрнитан стильлöн ассямаыс:
- Сёрнитан стильлöн формаöн частожык лоö очасёрни.
- Висьталöм выраженнёэз абу одзлань готовитöмöсь, сiйöн вермасӧ лоны не пыр йитöмöсь öтамöдкöт, ны коласын логика вермас дзугсьывлыны.
- Сёрнитан стильын пантасьлӧны тӧдса кыввез (пань, ва, пон, узьны, мунны), устнöй сёрниись кыввез (öнджа, да мый да, тай), а сiдзжö фразеологизммез (топыт кывтэчассэз) (юр вылас кöть майöг лöсйы, ныр сюйыштны, лöг петö), эмоционально-оценочнöй кыввез (рез-паз киссис, йирк-ёрк дорис), вводнöй кыввез (наверно, думайта), диалектнöй кыввез (вöдз, голик), парнöй кыввез (пожналö-зэрö, чужтiс-быдтiс, олöм-вöлöм), быдкодь ниммез да нимтаннэз (Опонь Васька, Серга Öльöш, Иван сват), пословицаэз да поговоркаэз (мый кöдзан, сiйö и вундан; не «трпу», не «ны»; оланыс быдлаö велöтас), кыввезлöн неöтпырись шуöм (сiдз-сiдз, колö-колö).
- Тшöка пыртöмась сёрниö вопросительнöй да восклицательнöй сёрникузяэз; простöй да неполнöй сёрникузяэз.
- Сёрнитiсь морт используйтö жесттэз да мимика.
Сёрнитан стиль пантасьлӧ гижиссезлӧн тексттэзын диалоггез аркмöтiкö.
