Висьтасян тип – сёрни тип, кöдаын казяссьöны чулалöм или öння кадö мунан событиеэз. Сылöн мог – юöртны кин керö, мый керö, кöр керö, кытöн и кыдз быдöс текстас керсьö действиеыс. Сэтшöм текстын кокнита казяссьö сьöрсьöн-бöрсьöн мунöм, кöда петкöтсьö кыввез – кадакыввез пырйöт.
Висьтасяна текст позьö пантавны унажыксö художественнöй литературалöн произведеннёэзын, кöр колö мыччавны действиелiсь мунöм, кадлiсь вежсьöм и с.о. Висьтасяна текст кокнита казяссьö и отир сёрниын, кöр колö уськöтны тöдвылö чулалöмсö, вöлöмсö, лоöмсö и с.о.
Висьтасян типа текст лöсьöтсьö то кыдз: [1] → [2] → [3] → [4]→ [5] …
Медодзза сёрникузяын казяссьö тема: кин йылiсь? мый йылiсь? Сёрникузя вермас пондöтчыны кыдзкö öтпыр, öтпырись кыввезсянь, кöднаын мыччассьö кад да места.
Висьтасян текстiсь позьö казявны, кыдз йитсьöмöсь ас коласын действиеэзыс, а схема отсöтöн туяс мыччавны сiдз:
Висьтасян типа текст = вöлöм действие (явленнё)1 + вöлöм действие (явленнё) 2 + вöлöм дейстиве (явленнё)3 …
Сьöрсьöн-бöрсьöн мунöмыс мыччассьö глаголлэз отсöтöн, нiя жö мыччалöны, кыдз паськалö ачыс висьтасян текстыс. Сёрникузяэз йитсьöны цепнöя. Кыввез сёрникузя пытшкын йитсьöны сiдз, медбы паськытжыка мыччавны сьöрсьöн-бöрсьöн мунӧмсӧ. Кадакыввезлӧн сэтшöм текстын öтiк мог – вежöртöтны действие, сiйöн оз пантасьö уна вежöртаса кыввез.
Мунiмö мийö Ефимычкöт öтпырись медодзза лым кузя вöравны. Кынтöм вöлi. Пыримö ылö вöрö. Рытнас пондiмö ни бертны гортö, локтiм неыджыт ю дорö. Вуджны сiйö юсö кыдзкö колiс. Видзöтам: одзаным косьмöм кöз ю вылас поперёк пöрöма. Вуджны сэтi позьö.
Кайис Ефимычыс ме одзын пöрöм кöз вылас. Мунö уввес коласöт жагöника. Но ю шöрас ёртöлöн нильдiс кокыс и сiя буз-баз усис ваас. Отсалi ме сылö юсис петны. Косьтiсьны пондiс ковсьыны.
Тэрмасьöмöн öзтiм костёр. Ефимыч сувтöтiс пишальсö пу бердö, пуктiс мыр вылö патронташ, чöвтiс вывсис фуфайка да пондiс косьтыны би весьтын. Вдруг менам ёртö шентiс бокö фуфайкасö, повзьöмöн горöтiс:
- Пышшам!.. – Ачыс сiя уськöтчис пöрöм кыз пу сайö, водiс да ыжмитчис му бердö.
Ме эг вежöрт, мый шогмис, но тожö тарöвтчи Ефимычыс бокö.
- Кык патрон костёрас усисö, - мыкталöмöн горöтчис сiя. – Быдсаöсь. Лыйны вермасö. Ме нiйö карманам тэчлi, медбы шупытжыка туйис мöдпöв зарядитны пишальöс, если ковсяс. (В. Я. Баталов).
Сетöм текстын висьтасьöмыс мыччассьö сьöрсьöн-бöрсьöн мунан действиеэз отсöтöн, кöда казяссьö сэтшöм кадакыввезын мунiмö мийö вöравны, пондiмö бертны, локтiм, кайис Ефимыч, мунö, нильдiс кокыс и с.о.
